المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات ولكن أحيانا ما يجعل من يسمعه هو الذي يغشى عليه.
( حصاوي جالس بالمقهى يقرأ في جريدة فيلتفت له شيخ الحارة بفضول)
حصاوي:
لا حول ولا قوة إلا بالله.
الشيخ:
إيه؟ حصل إيه؟
حصاوي:
مش بيقولوا أمريكا بتعرف دبة النملة في أي حته في العالم؟
الشيخ:
دي مش عايزه كلام. . عندها أقوى مخابرات في العالم.
حصاوي:
أهي طلعت ما بتعرفش أيوها حاجة.
الشيخ:
إزاي بقى؟
حصاوي:
تقدر تقول هي بتدافع عن مرسي ليه وعايزين يرجعوه للحكم ؟
الشيخ:
عشان الشعب اختاره في أول انتخابات ديمقراطية.
حصاوي:
يبقوا بيستهبلوا، لأن أول انتخابات ديمقراطية فيها أكتر من مرشح، كانت انتخابات سنة ألفين وخمسة اللي كسبها مبارك.
الشيخ:
لا دي كانت مزورة طبعا.
حصاوي:
يعني أنت رأيك أن أيمن نور جاب أصوات أكتر من مبارك؟
الشيخ:
أيمن نور مين؟
حصاوي:
أديك مش فاكره ولا عارفه، يبقى كان هيكسبه إزاي؟
الشيخ:
عشان الحكومة بتاعة مبارك وطبعا زورت له النتيجة.
حصاوي:
عندك دليل على الكلام دا؟
الشيخ:
لا إنما...
حصاوي:
الأمريكان قالوا إنها كانت مزورة؟.
الشيخ:
لا إنما...
حصاوي:
خلاص وإحنا نصدقهم المرة دي ليه؟
الشيخ:
قصدك إيه؟
حصاوي:
قصدي يا أما أنهم في المرتين ما عرفوش حاجة، يا أما في المرتين كانوا
عارفين إنها مزورة وعاملين نفسهم مش عارفين.
الشيخ:
ويعملوا كدا ليه؟
حصاوي:
أول مرة عشان مبارك كان صاحبهم لمدة تلاتين سنة، وتاني مرة لقوا أن مرسي مستعد يخدمهم أحسن من مبارك ومستعد يبيع لهم البلد بحالها.
الشيخ:
أنت لازم فلول.
حصاوي:
بص لحالي وهدومي وأنت تتأكد أني مش فلول.
الشيخ:
يبقي حد مديك حاجة عشان تشنع ع الرئيس.
حصاوي:
حاجة زى إيه؟ سكر ورز وزيت زى اللي وزعها الإخوان على الغلابة عشان ينتخبوا مرسي؟. بلاش دي.. الأمريكان ما يعرفوش أن جماعة من حماس وحزب الله هاجموا سجن وادي النطرون وهربوا مرسي وكام مجرم وإرهابي كانوا وياه؟.
الشيخ:
لسه ما اتعملتش محاكمة عشان نتأكد من الكلام دا.
حصاوي:
أبدا المحكمة قالت إن الكلام دا صحيح، وقريب هيتقدم مرسي للمحاكمة رسمي. مش كده وبس دي جماعته هما اللي هاجموا أقسام وسجون كتيرة وقتلوا وحرقوا، ولما سألنا مين دول، قالوا طرف تالت.
الشيخ:
طبعا طرف تالت.
حصاوي:
وأمريكا اللي قلبها علينا ما عرفتش مين الطرف التالت؟ ولا هي سكتت
عشان ضالعة في الحكاية وهي طرف أول؟
الشيخ:
المهم أن لسه ما فيش أحكام طلعت ضد أي حد.
حصاوي:
ومبارك لحد دلوقت لسه ما خدش حكم نهائي، يعني ممكن ياخد براءة.
يبقي الأمريكان اللي كانوا صحابه ما طلبوش يفرجوا عنه ليه؟
الشيخ:
والله الأمريكان أحرار يقولوا اللي هما عايزينه.
حصاوي:
أبدا مش من حقهم يحشروا نفسهم في حياتنا وهما بيطالبونا نخرج مرسي عشان يرجع يقول أنا الرئيس ومحدش يقدر يحاكمه ولا يحاسبه ويهدد القضاة زى ما عمل قبل كده فعلا.
الشيخ:
خلاص يبقى نستنى نشوف المحكم هتقول إيه.
حصاوي:
في إيه ولا إيه ولا إيه؟
الشيخ:
يعني إيه؟
حصاوي:
يعني الريس بتاعك متهم في قضايا كتير مش قضية واحدة.. ومش هو بس دا هو وكل اللي حواليه اللي وزع عليهم المناصب والفلوس والهدايا، دا غير المليشيات بتاعته اللي نازلة قتل وضرب وتعذيب وترويع للناس.
الشيخ
أنت هتسكت وتبطل الكلام دا ولا مش هيحصل لك كويس.
حصاوي
دا كان زمان يا عم الشيخ.
الشيخ
أنت يا فسل بتقولي كده؟
حصاوي
لأ مش هقولك أنت، أنا هقول للناس (ينهض ويحدث المارة) يا ناس..
الراجل دا عايز يدخلني معاه في جماعة الإخوان المتأسلمين.
( شيخ الحارة يهم بالجري لكنه يرى بعض المارة يتحركون نحوه بسرعة وفي عيونهم الغضب فيثبت مكانه).
( ثم يغشى عليه)
