مش معاكي
بس مش
رافضين ملامح ضحكتك
ولا طول خطاكي
ما انت ماشيه
وكلّنا ماشيين بنتعكّز وراكي
لا انت شايفانا
ولا احنا ف حلمنا شايفين سواكي
يا ابتسامة الأرض
يا اللي النيل رواكي بتمر حنّه
القلوب الطيّبة
مش لاقيه جنة ف ضفّتينك
القلوب الطيّبة
مش عارفه تستر نفسها بتوتك وتينك
القلوب الطيّبة بتحلف بدينك
إنك انتِ هتفضلي دايمًا يمينا
حتى لو قلتِ إننا ماحناش يمينك
يا ابتسامة الأرض
يا بنت البنات الحور
يا أحلامنا القتيلة
كلنا ماشيين بنتعكز
على السكك الطويلة
تضحكي نضحك بشدّة
وإن بكيتي
بنبكي من غير أي حيلة
ما احنا أولاد السبايا السود
وأولاد المناهدة
واحنا عشاق الحاجات المستحيلة
واحنا حيط الصد في وشوش الأعادي
واحنا سيف الرد والموتة النبيلة
واحنا ريحة الطمي ونصوص المعاهدة
واحنا خُدّامك وخدام القبيلة
يا ابتسامة الأرض يا بنت الخميلة
القلوب عماله بتدبدب برجليها التقيلة
القلوب عماله بتدبدب على البدن المسالم
القلوب عماله بتدبدب على الجتت النحيلة
يا ابتسامة الأرض
يا بنت الخميلة المستحيّة
كلنا أحلام عفيّة
كلنا راسمين ملامحك
ع السما وع المشربية
تؤمرينا الدنيا تضحك
تؤمرينا
قلوبنا تتحول رصاص للبندقية
تؤمرينا
نبدّل الأحلام بدانة ومدفعية
تؤمرينا بضحكتك
نصبح وطن ونصير قضية
يا ابتسامة الأرض
يا بنت الخميلة
الغايبة عن عين الغلابة
فرحانين بدموع عنيكي
وانتِ شايلانا على كفوفك ولايم للديابة
وانت بتغني لنا
أوجاع الهلالي بدون ربابة
فرحانين بدموع عنيكِ
وكلنا دايبين صبابة
فرحانين وأكيد هنفرح
لو دياب لم الزغابة
يا ابتسامة الأرض
يا بنت البلاد أم الضفاير
القلوب الصافية
مش جايبه البشاير
القلوب الصافية
مش جامعه العشاير للمصالحة
الشجر عطشان ووش الرمل كالح
الشجر عطشان وريحة الميه مالحة
والوشوش الفالحة بتضيع في الزوايا
اللي بيدوس ع السكك
بيدوس على جتت الضحايا
واللي واقف يروي سيرة الخضرا
بيتوه في الرواية
وانتِ بتعدي الحصا
ف قلب الرحايا
الدايرة من غير أي لازمة
الكلام محتاج مَلازم
وانتِ عايزة قيراط بلازما
يا ابتسامة الأرض
يا أيتها أزمة ف أي حارة
كلنا ماشيين بنهتف
خلف تجار الحضارة
كلنا شايلين على أكتافنا المحاجر
كلهم رابطين على قلوبنا الحجارة
كلنا واقفين بنستنظر ملامحك
زي ما واقفين بنستنى البشارة
يا ابتسامة الأرض
يا بنت الملاية اللف
يا أم العود زناتي
السما عصافير بتعزف
والقمر ضحكة ناياتي
السما أهازيج ملايكة
وضحكتك عود مزيكاتي
يا ابتسامة الأرض
يا بنت الغيطان
والغلّة والعنب البناتي
يا اللي ساحبانا على غمانا
لايد نخّاس فلاتي
القلوب
شبعت من الضرب اللي يوجع
زي ما شبعت من الفول الحراتي
