نعى الفنان وليد فواز الفنان الكبير محمود ياسين الذي توفي اليوم الأربعاء عن عمر ناهز 79 عاما.
وقال فواز عبر حسابه الرسمي بموقع التواصل الاجتماعي فيسبوك: "لسه سامع الخبر برحيل الأستاذ محمود ياسين. هذا الرجل فعلا كان محمود الأخلاق، ونجم بجد كبير، وقدوة، بقول ده من واقع موقف حدث بالفعل".
وأضاف: "في يوم من الأيام كنت ممثلا صغيرا لسه بقول يا هادي، بعمل دور صغير في مسلسل بطولة الأستاذ محمود وفنانة كبيرة، المهم مكانش معايا عربية، وظروفي على قدها وكنت شغال في مسلسل تاني بطولة فنانة تانية وزي ما بيحصل في أوقات كتيرة بيحصل تعارض مواعيد لعملين في نفس الوقت، وفِي الوقت ده ممثل صغير مش هيعرف ينظم أموره لافتقاره للخبرة وإن غالبا لسه أهميتك في العمل مش هتخلي حد يهتم قوي بمشكلتك، المهم إني كنت في مشهد لأول مرة هأمثل قدام الأستاذ محمود ياسين واتأخرت لظروف خارجة عن إرادتي في المسلسل التاني وتليفونات كتيير وتوتر وضغط وانت فين والأستاذ محمود مضايق وزعلان وانت هيطلع ***** وتشكيلة مفتخرة من اللي تخليك تخاف وانت رايح أصلا. وصلت بعد ما ركبت تاكسي دفعت فيه مبلغ كان صعب أني أدفعه في الوقت ده وأنا ممثل صغير وظروفي ساعتها أكيد غير دلوقتي (الحمد لله)، وصلت ودخلت على الفنانة الكبيرة اللي كشرت في وشي وسمعتني كلام لولا إن الواحد كان عنده حلم كان زماني سبت التمثيل".
وتابع: قالت لي "إزاي الأستاذ محمود ياسين هيسامحك؟" إنت تتأخر على الأستاذ محمود ياسين؟، دخلت على الأستاذ الكبير وأنا نفسيتي في الأرض وركبي بتخبط وفيه جوا خالص شعاع فرحة إني هامثل قدام محمود ياسين الممثل اللي بحبه، بس كلام الولية دي قفل الشباك في وش الشعاع.
وأردف فواز: حصل اللقاء الأول بيني وبين الراحل أستاذ محمود، قلت له: بجد أنا آسف، قالي إنت اسمك وليد صح؟ بيقولوا لي أنت ممثل كويس، فعيني دمعت، قال لي بص يا حبيبي إهدى خالص ولا تفكر في أي حد فيهم اللي هيعلق بس مع اللي بيتفرج شغلك مش أي حاجة تانية بكرة تكبر وتضحك على الموقف ده".
واستطرد: "الأستاذ محمود عينيه كانت باصة ليا زي الأب، وقال لي: ربنا يكرمك ويوفقك يا وليد إنت ممثل كويس، قمت بعد الشهادة الغالية من الأستاذ ومثلت، وخلصت وقلتله ربنا يحفظك يا أستاذ بسببك أنت تمالكت نفسي, رد عليا: "يابني أنا في يوم من الأيام مريت بحاجات شبه كده"، لما ربنا يكرمك متجيش على الصغير أو الغلبان، ونصايح كتير في مشواري لا يتسع الحديث عنها دلوقتي".
واختتم فواز: "آسف على الإطالة لكن الراحل هو الأستاذ العملاق الإنسان محمود ياسين اللي اتكتب عنه دلوقتي أقل ما يقال في نجم حقيقي زيه، أستاذ محمود رحمة الله عليه كان سبب إني أشوف جانب حلو ونضيف وايجابي في الوسط الفني، أنا بدعيلك بجد من قلبي بالرحمة، ربنا يرحمك ويتجاوز عن سيئاتك ونقابلك في دار البقاء، سلام".
