والله.. والعيش والرنجة.. خصيمك النبي ياد يلي هناك.. يا حاجه يلي بتبُصيلي.. إنتي يا ست إنتي.. أيوه انتي، أعيرني ودانك القفة دي خمسة.. أنت ياد يا أبو قوصة.. والأخت المُزة اللي هناك.. اسمعوا .. وعوا ااااا .. النهارده الشم الأكبر.. شم النسيم.. كل سنة وانتوا ما أنتخين.. أيوه كله فاتح النهارده ع الرابع.. الستر من عندك يا ستار.. مفيش واحد إلا وحالف ليجيب بطنه عاليها واطيها.. الكل جاهز بأسلحة سنانه الفتاكة للانقضاض والأكل والهضم للرنجة والبصل الأخضر.. ارحم يا مولانا.. الرحمة يا حاجة.. بشويش يا جدو.. كلوا بالهنا والشفا بس بهدهدة.. بالراحة .. واحدة واحدة .. تاتا .. تاتا .. لقمة بلقمة.. ده مش آخر شم نسيم يا جماعة.. لسه الشم كتير جاي وطولة العمر لـ"الأكيلة".. خليك عاقل يا سوسو، كفاية حتة رنجاية وعود البصل واحبس بكوباية الشاي.. إيه؟؟.. ماشي.. طَرّي يا سيدي على المعدة، نوه بروبلم.. اديها حاجة ساقعة.. اديها جلاتيا.. أخي الرنجاوي.. أختي الفسختاوية.. عمنا السرديني.. احترسوا من الأنتخة والفسيخ المضروب.. عينكم ف راسكم.. لقد أعذر مَن أنذر.. ورنجة تفوت ولا حد يموت.
