لو انت من مستقلي التكاتك وغاوي تكتكة، يبقى أكيد بتشوف الجمل الجبارة اللى بيكتبها سواقين التكاتك على ضهر كل توك توك، واللي بدأت بمافيش صاحب يتصاحب وكل سواق ومزاجه وكل جملة بتعبر عن شخصية سواق التوك توك يعني لو حد قرفان من حياته يكتب "لا أمان للبشر" ولو سواق "عايق" بيكتب "الحلوة مصروف عليها" أما لو سواق دماغه عالية فلازم يطلع "الهبو" فى جملة مفيدة زى "دماغ بلا كيف تستاهل قطعها بالسيف".
ويبدو أن سائقى التكاتك دايما "قرفانين" من البنات وبالذات المتجوزين، تلاقيهم كاتبين "كله شمال" و"خليك لعيب وبلاش تخيب" ودى نصيحة للى لسه ماتجوزوش، وفيه اللى مثقف وكاتب "الهم يعني امرأة"، ومش بس كده دا التوك توك كمان دخل فى السياسة وبينقل رسايل زى "لو صباعك مش بمبى بلاش تعدى جنبى" و"مصر أد الدنيا وهاتبقى أد الدنيا".
الحسد أكثر حاجة بيخاف منها سواقين التكاتك ، ومن أكثر الكلمات اللى بتتكتب على التكاتك هى "ماتبصليش بعين رضية " و"يكفيكى شر الميكانيكي" و"عليها أقساط"، أما أغرب حاجة شوفتها مكتوبة على أحد التكاتك هى " لو باض الديك هاعديك" وهذا إن دل فإنما يدل على أن سائق التوك توك يتسم بالرخامة وياريت ماحدش يفكر يقوله عديني .
