كشفت عبير أحمد، مؤسس اتحاد أمهات مصر للنهوض بالتعليم، عن كواليس أول ليلة امتحان بالثانوية العامة في زمن فيروس كورونا قضوها الطلاب وأولياء الأمور.
وقالت عبير، في تصريحات صحفية اليوم الأحد، إن القلق والتوتر والخوف كان يخيم على أولياء الأمور من الأمهات استعدادا لأول امتحان في الثانوية العامة بمادة اللغة العربية، في ظل فيروس كورونا، حيث تم تجهيز كل متعلقات الطلاب ووسائل الوقاية من كمامات وغيرها، فضلا عن نوم الطلاب في وقت مبكر فيما غاب النوم عن الأمهات بسبب القلق والتوتر.
وتفاعل المئات من أولياء الأمور على صفحة اتحاد أمهات مصر، في فيس بوك، حيث قالت ولي أمر: "أطول ليلة مرت عليا في حياتى، صاحيين من امبارح، دقات قلبي أسرع من القطر بس عامله نفسي قويه عشان ابني".
وأضافت ولي أمر: "الحمد لله، حضرت حاجة بنتي واتعشت ودخلت نامت نحو الساعة 12 وصحيت تراجع شوية قبل ما تنزل الامتحان وأنا كنت قلقانة بحاول أنام"، وتابعت أخرى: "ابني بيقول ناسى كل حاجة كأنه مش مذاكر خالص، وأنا قاعدة معاه بحاول أفهمه إن ده مجرد إحساس لكن أول لما يشوف الامتحان هيفتكر، بس مش عارفة أسيطر بصراحة ربنا يستر".
واستكملت ولي أمر: "عملت أكل بنتي بتحبه وحضرت لها حاجتها وعملت لها عيش طازة علشان تفطر منه الصبح، ومسألتهاش خالص عملتى ايه ولا خلصت مراجعة ولا لا ودخلت نامت بالليل"، وتضيف أخرى: "أنا منمنتش من يومين بسبب القلق.. جهزنا أدواتهم، شجعناهم، قراءة قرآن، صلاة الحاجة، الدعاء، أحمد بينام وأنا فضلت صاحية لحد ما راح اللجنة، وطلعت على الشغل بس ربنا يطمنا عليهم كلهم"، وتقول أخرى: "جهزنا اللبس والأدوات والبطاقة وكله تمام وأكلت بنتي بصعوبة، ونامت صحيت بدري تراجع وربنا يوفقهم كلهم ويحفظهم ويفتح عليهم ويسهل ليهم الصعب يارب".
