يناشد أهالى شارع مجمع المدارس بأرض اللواء بمحافظة الجيزة، المسئولين بالحى بإصلاح وتغطية «بالوعات» الصرف الصحى، التى تهدد بكارثة لكبار السن وتلاميذ المدارس.
تقول «أم محمد» والدة أحد التلاميذ: «البلاعات بقالها فترة كبيرة بدون غطاء، وعملنا أكثر من شكوى فى الحى، لسه عيل صغير واقع فى بلاعة بس الأهالى لحقوه وأنقذوه من الموت، وبعدها قام الأهالى بتغطيتها بطريقة عشوائية».
وتابعت: «فى أطفال بييجوا المدرسة من غير أهاليهم، وبتكون الدنيا زحمة وأى طفل ممكن يقع فيها من غير ما ياخذ باله».
ويلتقط طرف الحديث «أبو مازن» قائلا: «إزاى طريق رئيسى بيمشى فيه أطفال يكون بدون رصف وغطاء بلاعات، وبعدين إحنا ما بنطلبش المستحيل، كل اللى بنطلبه حد من المسئولين يشوف الشارع عامل إزاى وهل يرضى إن حد من أولاده يتعرض للخطر ده».
