العنوان مافيهوش غلطة مطبعية ولا حاجة، أيوه إضراب العواطلية ماتستغربش يا نجم احنا العواطلية نعتبر أكبر نسبة في البلد ولو عملنا إضراب اقتصاد البلد ممكن يقع وينهار اكتر، اقول لك انا، مين بيشغل القهاوى ليل ونهار مش احنا؟! مين مقضيها صعلكة في الشوارع وينفع بتاع الدرة والترمس والفشار ويتفرج عالفتارين ويعمل زحمة في وسط البلد ؟؟ مش العواطلية؟؟ مين بيشترى الجرانين للبحث عن وظائف خالية في صفحة إعلانات مبوبة اللى كنا بنقراها زمان إعلانات "مابوبا" ولا عمرنا تخيلنا اننا هنبقى اصحاب الصفحة في يوم من الايام.. تخيل كده لو عملنا إضراب ؟؟؟ القهاوى هتفضى والعمالة اللى فيها هتوصل لأدنى معدلاتها... هتنقرض مهن شوى الدرة وبل الترمس وطقطقة الفشار وشطشة حمص الشام، ودى مهن فاتحة بيوت ناس كتير، وسط البلد هيفضى تماما ولا هيبقى فيه صريخ ابن يومين، شوف بقى ده هيقصر على اقتصاد الجمهورية أد إيه؟؟.
