مبدئيا كده أنا كبنت ماليش ف الكورة ولا اعرف عنها اى حاجة .. مجرد مصطلحات (ضربات جزاء .. فاول .. ضربة حرة مباشرة وغير مباشرة .. ضربة رُكنية ) ومعرفش معنى ولا حاجة فيهم الحمد لله .. بس أعرف إنى أهلاوية وإن الزمالك بيخسر كتير علشان كده الزملكاوية ضغطهم ديما عالى .
أكيد الرجالة كلهم ليهم ف الكورة وحتى الاستثناءات القليلة اللى مالهاش أكيد بتابع كأس العالم .. الست الشاطرة بقى اللى تعرف تعدى الفترة دى مع جوزها أو خطيبها على خير مطلوب منك إيه بقى علشان تبقى شاطرة ومتطلقيش ولا تفركشى:
- تابعى أخبار الرياضة في الفترة بتاعة كأس العالم "معرفش امتى بس هى ف شهر 6 " علشان تلاقي حاجة تتكلمى معاه فيها لأنك لو فتحت أى موضوع تانى هـيتجاهلك تماما من غير أدنى شعور بالذنب.
- لو إنتى لسه مخطوبة حاولى على أد ما تقدرى بلاش استفزاز لأن سيادته هيبقى بيتلكك علشان يتخانق معاكي ويروح يشوف الماتش.
- التليفزيون خلال الفترة دي ممنوع منعا باتا تقربي منه وإلا استحملى اللى هيحصلك والموال اللى هتسمعيه عن عدم اهتمامك وعدم قدرتك على تحمل المسئولية .. آه مالهوش علاقة بس هو كده.
- لو حبيتِ تعدي أدام التليفزيون والماتش شغال ومضطرة أوى يعنى مثلا هو الطريق الوحيد علشان تروحى الحمام .. شوفتى بيعدوا الأسلاك الشايكة إزاى ف فرق الصاعقة اعملى كده .. أو اتصرفي ف أي دُرج بقى المهم متعديش من أدامه الساعة دي.
- حاولى تتغاضى عن أي ألفاظ سيئة أو قبيحة أو أول مرة تسمعيها يعني متقفيش على الواحدة لأن الإقبال على القباحة هيكون تاريخي يافندم.
- اعرفي إن جوزك مش هيتكلم معاكى الفترة دى غير علشان ياكل أو يشرب .. غير كده ولا حاجة انتى لما تنادي مع نفسك بقى مش هيعبرك.
- لو شوفتيه مضايق علشان الفريق بتاعه خسران بلاش والنبى تقوليله عادى دى مجرد لعبة يابيبى هيتعصب عليكى أكتر صدقينى.
- ممكن لو هتستحملى تتفرجى معاه على ماتش من الماتشات تعرفى برضو إنك مش مسموحلك بالكلام إلا ف الاستراحة اللى بين الشوطين ولو الفريق بتاعه كسبان.
- بلاش تعلقى كتير على انه بيشوف إعادة الأهداف دى حاجة مهمة بالنسبة ليه مش بيزهق منها زى ما انتى مش بتعرفى تبطلي أكل بالضبط ومش بتزهقي منه .
- لو فيه أى مناسبة اجتماعية .. اعرفي انك هتعتذري عنها او هتحضريها لو حدك لأن البيه مشغول.
- لو بيشوف ماتش متعاد حاولي بلاش تجادلي لأن احنا اتفقنا مالكيش دعوة بأم التليفزيون الفترة دي.
- طالما كده كده الأجهزة الكهربية عليكي جيبي لنفسك تليفزيون واعملي حسابك ياعبيطة.
