الأدب بصور فنونه المتنوعة يحاول أسر التجارب الإنسانية المنفتحة واللامتناهية لثراء التجربة البشرية، ولا شك أن الشعر أحد هذه الفنون التي تحاول التحليق في فضاء الخيال، وربما هو الوسيلة الأكثر فاعلية في التعبير عن الأحلام والانفعالات والهواجس في وعي الإنسان وفي اللاوعي أيضا، وتتنوع روافد القصيدة من حيث الموضوع والشكل ليستمر العطاء الفني متجددا ودائما كما النهر..
تنشر "البوابة نيوز" عددا من القصائد الشعرية لمجموعة من الشعراء يوميا.
واليوم ننشر قصيدة بعنوان "إفرح" للشاعر الدكتور جمال الشاعر.
إفرح
أعظم انجازاتك..
ذاتك
افرح وانجح
رغم انكساراتك
حاول تصلب طولك
وانته بتجرى
واكتب؟ في سجل انتصاراتك
أنا مش فاشل
ولامتشائل
أنا رجل عاقل
لو شفت مشكلات
مابمشكلهاش
باستهدى وبنصح نفسى راجع حساباتك
واحلم وانته ف أصعب أوقاتك
وارسم روحك رغم جروحك
راية ف عز انتكاساتك
اتراهن على نفسك
واتأكد إن
انهزاماتك
هيه اللى حتصنع بطولاتك
لو جالك واحد عايز احباطك
قل له..
من فضلك.. نقطنا بسكاتك
أعداءك مش داءك
أعداءك خوفك وكسوفك.. وشجاعتك هى مصداتك
اخشوشن واتجنن
واثبت للكون إن إنته مذاكر ومعلم
افرح وري الدنيا ابتساماتك
اتحدى وطلع كراماتك
من حقك تفشل أحيانا..
وتقوم تجرى تدب تشب تهب تعوض كل ما فاتك
افرح
وانفض يأسك
واصل شطحاتك
اتغير
غير كل غباواتك
امشي في سكة جديدة بكل طاقاتك
جرب تكسب.. واهزم خوفك غامر..
صاحب صاحبك واخلص لحبيبتك والعن ابو فيسبوكاتك
افرح
وابعت تغريدة لصورتك.. عبر عن اعجابك بشقاوتك
بزكاوتك
هرجلتك برجلتك وشياكتك
عشوائياتك
انزل للواقع
الواقع مش دايما واقع للدرجادى
ولا فكره أحادى
طلق صفحة اوهامك واتحرك ف الملكوت.. الناحية دى
والناحية دى
استعدل وضع منصاتك
أو عدساتك
اتنونس باخواتك عماتك وخالاتك وجيرانك زملاتك
اعمل عزوة في دنيا صعيبة.. واترحم ع الأيام الحلوة
قبل ما تترحم على أمواتك
أجمل حاجة تشد عزيمتك
إنك تعرف قيمتك
لما حبيبة قلبك تدعيلك
في صلاة الفجرية
"روح ربنا يسعد أوقاتك"
حاول تهدى لها في سجدة سهو
اعتذراتك
صلى.. وسلى صيامك وزكاتك في الحضرة
وطبطب على ايدها الطاهرة وهى بترفيلك شراباتك
لو قضيت العمر توفى جمايل
مش حيكفى خلاص الروح
ولا صرخة آه
ساعة تشريفك في الدنيا
ولا أغنية جميلة تقولك
حلقاتك برجالاتك
استرجل وابرم شنباتك
افرح
واجه صعوباتك
كن متوحش
خربش
اوعى تبربش
خليك سادى وجن مصور.. واكبح شهواتك
روض كل وحوش الغابة وشارك صحاباتك
وابدا بيهم رحلة جديدة
واتورط في جوازة سعيدة
يمكن تتجاوز عقباتك
افرح.. تنجح
بس اتعلم من اخطاءك
واستسلم فورا وارفع راياتك
لما تشوف تهديد الست حماتك
افرح
واضحك من قلبك وافهم إن مقامك غالى
وان الناس عايزبنك تفلح
اتلحلح واستفتح بسم الله
وصحصح وادردح واكدح
بكره عدوك حيجيلك متكسح وبيتطوح من ضرباتك
انته رئيس الجمهورية
بتاعت أحلامك وطموحاتك
متخافش ورشح نفسك
ومسيرك تنجح
افرح
