يعانى أهالى شارع مندور بأرض اللواء، من طفح المجارى، والتى دفعت الأهالى للتقدم بعدد من الشكاوى والاستغاثة بالمسئولين لإنقاذهم من رائحتها وشكلها وانتشار الحشرات بسببها.
يقول «عم على»، ٤٠عاما، أحد سكان المنطقة: «أنا تعبت من ريحة المجارى هنا، وبتحرج جدا لما حد يجى يزورنى ويشم الريحة ولا يشوف المنظر ده، لذا أرجو من المسئولين أن ينظروا لحالنا إللى ما يرضيش حد، رغم أنه شارع كبير بس ما فيهوش اهتمامات».
وتضيف «أم هيثم»، ٥٠ عاما، ربة منزل: «لما بنزل أشترى طلبات البيت أوقات كتير بعجز من المشى فى الشارع بسبب المجارى المتراكمة والرائحة القاتلة».
وأشار «محمد أحمد»، ٣٣عاما، إلى أن الشارع هنا واسع وعام، يعنى المفروض يكون فى خدمات أكتر من كده، وبعدين دى مش أى حاجة عادية، دى مجارى، المفروض يكون لها مكان خاص بيها، مش نمشى عليها وأحيانا تدخل الورش والمحلات هنا، يا ريت حد يتفهم ويسمع شكوتنا، بدل ما حالنا كده.
واختتم أهالى شارع مندور بأرض اللواء قائلين: «نناشد المسئولين أن يعالجوا هذه الأزمة قبل دخول فصل الشتاء».
