ردا علي منتقديه ومهاجميه في أغنيته التي تغني بها في إعلان فودافون والتي قال فيها جملة الفلوس مش كل حاجة تحدث شيبة لـ"البوابة نيوز" منتقدا كل من قام بالتهليس عليه وقال: أوجه كلمه لكل الناس اللي هلست علي الإعلان اللي قلت فيه جملة إن الفلوس مش كل حاجة وبيقولولي إزاي وأنت مغني آه لو لعبت يا زهر ولعبت معايا وبعدها أقول كدة أحب أقولهم إن فعلا الفلوس مش كل حاجه ونجاحي دا اللي أنا والحمد لله وصلتله دا بتعب كبير وجهد وزي ما قلت قبل كدة أنا لحست الأسفلت علشان أبقى أحمد شيبة.
وأضاف: كله برضا ربنا سبحانه وتعالي ووقفته جنبي ودعاء ورضا أمي وأبويا عليا ووقفة أم أولادي جنبي ربنا يخليهالي ويباركلي فيها وثقة الناس اللي بيحبوني ووقفتهم جنبي واللي وصلتله.
وتابع شيبة: اللي بقيت فيه دا كرم من ربنا أنا فعلا تعبت واجتهدت كتير من وأنا عندي 13 سنة علشان أوصل لهدفي وأحقق حلمي اللي الحمد لله ربنا أكرمني فيه ووصلتله وكله من عند الله.
وقال: عقبال كل الناس لما الزهر يلعب معاهم ويحققوا كل اللي بيتمنوه وإحنا اللي بنعمل الفلوس مش الفلوس اللي بتعملنا وزي ما قولت الفلوس ما بتعملش رجال.