المواطن الغلبان حسن المثقف يُغشى عليه من حين لآخر، وعندما يفيق لا يفهم ما حدث حوله من تغيرات ولكن أحيانا ما يجعل من يسمعه هو الذي يغشى عليه.
(حضر حصاوي ندوة حول الحراك السياسي الآن وتحديات المستقبل، فسمع
شاب في الخامسة والعشرين يتحدث بحماس عن الزعيم جمال عبد الناصر، ويرى أننا في حاجة إلى زعيم مثله اليوم وتنتهي الندوة فيتقدم له حصاوي)
حصاوي
تسمح لي يا أستاذ؟
المثقف
أتفضل.
حصاوي
أنا عندي سؤال وعايز آخد رأيك فيه، باعتبارك مثقف، مش برضه حضرتك مثقف؟
المثقف
“,” شور “,” قصدي طبعا، اسأل بس بسرعة عشان مستعجل.
حصاوي
أنت عايز زعيم زي عبد الناصر ليه؟
المثقف
كل اللي قلته في الندوة من شوية وما خدتش بالك؟ لأنه قضى على الإقطاع وسيطرة رأس المال على الحكم، وأقام حياة ديمقراطية سليمة، وأقام عدالة اجتماعية وبناء جيش وطني قوي.
حصاوي
( يفتح فمه بدهشة ثم يغرق في الضحك )
المثقف
( بتعجب) أنت يتضحك على إيه؟ طبعا دا كلام بتسمعه لأول مرة؟
حصاوي
( ينظر له ثم يضرب كفا بكف)
المثقف
أنا أنصحك تقرأ كتير ( ويهم يمشي)
حصاوي
ما أنا قريت دا كله؟
المثقف
أمال مستغرب من إيه؟
حصاوي
وسمعته مبارك بيقوله وقبل كده السادت.
المثقف
كلهم غشوا من عبد الناصر، أنا ممكن أديك عنوان كتاب تقرأ فيه دا كله بالتفصيل و..
حصاوي
( مقاطعا ) متشكر.. عندي.
المثقف
عندك الكتب دي ؟
حصاوي
آه هي أتغيرت ؟
المثقف
لأ طبعا.
حصاوي
هي في الحقيقة مش عندي لأني بعتها لبتاع الروبابكيا لكن سمعتها في الراديو وشفتها في التلفزيون ولحد دلوقتي من وقت والتاني بشوفها فيديو لما حفظتها، تحب أسمعها لك؟
المثقف
ولما أنت حافظها إيه مشكلتك ؟
حصاوي
مشكلتي أني ما حفظتهاش بمزاجي .دا غصب عني
المثقف
مش عاجبك عندك الحرية تطفي التلفزيون.
حصاوي
كل خطبه كان التليفزيون والراديو يذيعوها ليل ونهار، وعلى التلات قنوات. أصل ماكنش فيه غير تلات قنوات، واخد بالك؟.
المثقف
وافرض إيه المشكلة؟.ما عن ما عجبك عبد الناصر بناقص واحد يا أخي.
دا كان بياخد في الاستفتاء والانتخابات أكتر من تسعه وتسعين في الميه.
حصاوي
المشكلة أنهم كانوا كل سنة يجيبوا لنا أسئلة في الخطب اللي بيقولها، وإن
ما كتبتش اللي يعجب الوزارة سقطوني.
المثقف
خلاص يا أخي كنت تكتب اللي هما عايزينه عشان ينجحوك.
حصاوي
عملت كده، بس لما أتخرجت جندوني.
المثقف
دا شرف أنك تحارب دفاعا عن وطنك.
حصاوي
بس أنا مالي ومال اليمن هي كانت جت جنبنا؟
المثقف
بلد عربي شقيق ولازم نسانده.
حصاوي
عموما أنا أنصبت بإصابة بسيطة.
المثقف
حظك حلو غيرك اندبحوا بالسيوف.
حصاوي
يا دوب رجعت قالوا لي روح حصلهم على سينا، وهتستلم هدوم الجندية من هناك.
المثقف
يعني أنت حاربت في سينا في 67؟
حصاوي
ما لحقتش أنا يا دوبك رحت، لقيتهم راجعين مشي على رجليهم ومش لابسين غير الفانلة والكلت، ولا مؤاخذة.
المثقف
وبعدين؟
حصاوي
السيد الرئيس ربنا يطول عمره، قصدي يحميه في تربته، طلع في التلفزيون وقال حقكم عليا وأنا غلط وعشان كده همشي، الناس طلعت تهتف وتصرخ
وتعيط وتولول.. ما تسيبناش يا ريس. فايتنا لمين؟ هتفت ومشيت معاهم.
المثقف
يعني عرفت قيمته أخيرا؟ إنما رحت وراهم على فين؟.
حصاوي
أنا عارف؟ مشيت وراه وخلاص، لقيت نفسي في الجنازة بتاعته.
المثقف
الله يرحمه. بس أنا برضه ما فهمتش إيه مشكلتك بالظبط؟
حصاوي
( وهو يتلفت حوله ) هو الميت ما بيقومش مش كده؟
المثقف
طبعا.
حصاوي
الحمد لله، أصل أنا نفسي أنتخب السيسي رئيس جمهورية لجمهورية مصر وخايف محسوبك يطلع لنا فجأة ويبوظ الدنيا.
( المثقف يغشي عليه )
