المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات، ولكن أحيانا ما يجعل من يسمعه هو الذي يغشى عليه.
(حصاوي جالس على مقهى الحي يلاحظ أن أحد جيرانه جالس في ركن ويبدو الهم على وجهه)
حصاويمالك يا صاحبي, شايفك حاطط إيدك تحت دقنك وبتفكر. إيه اللي شاغلك؟
الجار30 يونيو.
حصاوىاشمعنى 30 يونيو؟
الجاركل شهر يونيو بقلق منه، أصل دا اللي حصلت فيه النكسة.
حصاويأنت لسه فاكر؟
الجار(هامسا وهو يتلفت حوله) وسمعت أن صاحب القهوة هيغير اسمها من يوم 30 يونيو ويخليه (قهوة تمرد).
حصاويطب وإيه اللي مخوفك؟
الجارخايف ييجي جماعة من الإخوان ويكسروا القهوة واللي قاعدين فيها.
حصاوي(هامسا) لا دا كان زمان وجبر، دلوقت هما اللي خايفين من الناس اللي هيطلعوا ضدهم يوم 30.
الجاربس المرشد بتاع الإخوان هدد اللي يطلعوا مظاهرات في اليوم ده.
حصاوىهددهم بإيه؟
الجار(يتلفت حوله ويهمس) هددهم بغضب الله!
حصاويلا يا شيخ؟
الجارأنا لسه قاري له تصريح في الجرايد بكده.
حصاويوهو إيش عرفه إن ربنا معاه هو وجماعته؟
الجارمش هو المرشد؟ يبقى هو عارف.
حصاويمرشد جماعته هو وبس، ومحدش قال إنه متصل بالسماء أو بينزل عليه وحي..
أستغفر لله العظيم.
الجارأيوه بس ..
حصاوىما بسش، شباب الإخوان نفسهم رفضوا ينزلوا ضد بتوع تمرد من غير
ما ياخدوا ضمان بسلامتهم.. يعني مش واثقين في كلام المرشد أن معاه ربنا.
الجارأكن ممكن تحصل معركة بين دولم ودوكهما؟
حصاويوهي دي هتبقي أول مرة؟ ما احنا بقالنا سنتين ونص ع الحال دا.
الجاروالشرطة هتعمل إيه؟
حصاويبتقول مالهاش دعوة.
الجاريا خبر أسود تقف تتفرج وهي بتشوف الناس بتقتل بعض؟
حصاوىهي قالت كده،لكن لله أعلم هتعمل إيه.
الجاريعني ممكن تنحاز لحد؟
حصاويمعرفش بس الشرطة متحرج عليها تخش المحافظات اللي على القناة، دي هيتولاها الجيش.
الجاروإحنا في القاهرة مين يتولانا؟
حصاويربنا.
الجاربرضه ما فهمتش الشرطة والجيش هيكون دورهم إيه؟ هيقفوا متفرجين؟
حصاويلأ طبعا هيلعبوا دور الحكم بين الفريقين، فريق المؤمنين وفريق الكفار.
الجارومين اللي قال إن دول مؤمنين والتانيين كفار؟
حصاوياللي سبق وسمى جماعته بالإخوان المسلمين ولبس الفانلة الخضرا اللي عليها السيفين،عشان كده الجماعات التانية سمت نفسها السلفيين والجهاديين والنور. لكن الباقيين اللي سموا حزب الدستور والتنمية والوسط والكلام دا, عشان كده بيعتبروهم كافرين.
الجارودا كلام؟
حصاويآه كان ممكن يختاروا اسم من البيئة بتاعتنا يعني مثلا حزب القمر.. الهلال حزب الجمال حزب الصحراء. كده يعني.
الجارما قولتليش.هي العركة دي على إيه بالظبط؟
حصاويأبدا. الناس عايزة تشيل مرسي زي ما شالت مبارك قبل كده وقالت له ارحل.
الجارطب ومرسي ما يعملش زيه ويرحل ليه؟
حصاويصعب لأن مبارك ما رحلش عشان المظاهرات قالت له ارحل, هو تنحى لما البلد خربت وبقت السجون بتتهاجم وبيطلع منها المجرمين وطاحوا يحرقوا في البلد والناس افتكرت أن بتوع مبارك هما اللي عملوا كده.
الجارأمال مين اللي حرقها؟ واتحاكموا ولا لأ؟
حصاويما هما كانوا محبوسين في السجون أساسا، هيحاكموا نفسهم؟؟.
الجار(بحيرة) أنا بفكر يوم 30 أروح أي حتة في مصر ما يحصلش فيها مشاكل.
حصاويللأسف ما فيش.إلا إذا رحت سينا.
الجاراشمعني.
حصاويأبدا.هتعيش في أمان.المهم ماتقولش لحد إنك مصري!
(الجار يغشى عليه في الحال)
