كشفت الفنانة إنجي خطاب اسباب قرار اعتزالها الفن وكتبت على صفحتها الخاصة بموقع التواصل الاجتماعي فيسبوك:"
تساؤلات كتيرة ليه أنا اعتزلت ناس تقول مخدتش حقها واتظلمت وموهبة وخسارة وناس تهزر وتقول عاوزة تعمل تريند تزود شهرتها اللي يعرف إنجي خطاب كويس هيعرف إني مش بتاعة تريندات ولا ليا في علاقات وخروجات وشلل ولا حفلات ولا بحاول الظهور في أي مكان غير شغلي فقط وعمر ما في حد بيقابلني صدفة حتى في أي مكان لأني ببساطة مش مختلطة بالوسط ولا بخرج مع حد وأغلب صحابي وحياتي بعيدة عن الوسط الفني خالص".
وتابعت:" باختصار قرار اعتزالي دا قرار بجد خدته بكامل إرادتي لأسباب تخصني متخصش أي حد ومحبش أساسا أكون مجالا لأي كلام وكل الناس عارفة كويس أوي مين إنجي خطاب، وأنا لما قررت أعتزل مكلمتش ولا حد عشان محدش يقصر عليا وخدت قراري ونزلته على صفحتي بوست اخدوه الصحفيين من عندي متصلتش بحد أصلا ولا برد على حد.. فأرجو تراعو مشاعر الناس وتحترموا قراراتنا وحياتنا واللي بنمر بيه محدش عارف يعني إيه فنانة لسه صغيرة في بداية مشوارها توصل لقرار اعتزال محدش عارف قمة الآلم اللي بيحسه واليأس اللي وصلوا بلاش تجريح في الناس وهزار رخيص، أنا بقي مش بتاعة تريندات لأني ليا اسمي الحمد لله وأعمالي مش محتاجة اعمل زفت تريند والقرف بتاعكم دا وقرار اعتزالي دا بجد ولا يفرق معايا تريند ولا يفرق معايا دنيتكم كلها أصلا.. ارحموني بقي أنا فيا اللي مكفيني.. شكرا".
