قالت السيدة أم وليد، أول وأقدم سائقة تاكسي في مصر، والتي تسكن بمنطقة شبرا، إنها تعمل في مجال القيادة منذ عام 1980 عندما كانت في سن الـ25 من عمرها، موضحة أن عائلتها بالكامل تعمل في هذا المجال.
وأضافت "أم وليد"، خلال لقائها ببرنامج "من أول وجديد"، المذاع عبر فضائية "الحدث اليوم"، والذي تقدمه الإعلامية نيفين منصور، مساء اليوم الأحد: "أهلي علموني السواقة وأنا صغيرة جدا، حبيت السواقة واشتغلت بيها لأني مكملتش تعليمي وإخواتي كلهم اتعلموا إلا أنا، ساعتها قررت أشتغل وأثبت للجميع أني أقدر أكون زيهم وأحسن منهم بمجهودي وتعبي واشتغلت على نفسي وتحديت الظروف لحد ما بقى ليا اسم في مجال السواقة".
وتابعت: "طلعت رخصة سنة 1980 ومحدش اعترضني ساعتها والضباط كانوا فرحانين بيا وكانوا بيساعدوني، معقبة: "أول يوم خرجت فيه بالتاكسي مكنتش أعرف المناطق كويس وده سببلي مشاكل كتيرة لأني مكنتش أعرف أسماء أشهر المناطق في مصر، ومكنش بيتفاجأ بيا إلا اللي مربيين دقنهم لأن موضوع أن ست تسوق تاكسي في الوقت ده كان غريب شوية".
وأوضحت أم وليد: "الشباب والبنات لما كانوا بيوقوفني عشان أوصلهم ويعرفوا أني ست كانوا بيبقوا فرحانين أوي ويقعدوا جمبي قدام في التاكسي ونقعد نتكلم مع بعض طول الطريق، معقبة: "ساعتها كان عندي 25 سنة واتعاكست كتير لأني كنت مهتمة بنفسي ولبسي واللي كان بيعاكسني كنت بسلموا تسليم أهالي للضباط".
