مصطفى خاطر يعلن انتهاء تصوير "طلقة حظ"

انتهى الفنان مصطفى خاطر وفريق مسلسل طلقة حظ من تصوير المسلسل.

وكتب خاطر على صفحته الشخصية بموقع التواصل الاجتماعي فيسبوك: "فركش طلقة حظ الحمد لله.. بشكر كل واحد ساهم في العمل من أصغر عامل لأكبر واحد.. شكرا شركة سينرجي تامر مرسي.. حسام شوقي.. تامر فتحي للمجهود الجبار وسرعة الاستجابة لتداعيات العمل". 

وأضاف خاطر: "Ahmed Khaled Amin أنت مخرج جامد جدا مخلص جدا بتحب شغلك أكتر من أي حاجة وأنا مبسوط أني اشتغلت معاك بجد اتعلمت منك كتير أنت وكل طاقم العمل اللي معاك وعلى رأسهم أحمد عبد الوهاب الدؤوب".

وتابع خاطر: "الشكر كل الشكر للمؤلف الكبير الصغير إيهاب بليبل علي المجهود الجبار وعلى الورق الحلو ده اللي ادانا فرصة للتمثيل بشكل جديد علينا". 

وأكمل: "بشكر كل أخواتي الممثلين اللي شاركوني العمل بجد كنا أسرة واحدة وأنا سعيد جدا جدا بالشغل معاكم لأنكم من أهم ممثلين مصر وانا اتعلمت منكم كتير وشرف ليا أني أكون في وسطكم". 

واستطرد: "شكرا جدا للأستاذ عز العرب مدير التصوير على الصورة الحلوة دي وعلي تعبك ومجهودك أنت وكل الطاقم اللي معاك وعلى رأسهم بسام وإضاءة مرسي وإبراهيم، شكرا للمونتير الشاطر محمد السعدني على تعبك ومجهودك وربنا يكون في عونك إحنا كلنا فركشنا ماعدا أنت".

ووجه خاطر أيضا الشكر للموسيقار محمد مدحت، وكذلك السيناريست أيمن بهجت والملحن وليد سعد والمطرب النجم مدحت صالح على أغنية التتر، بالإضافة أيضا إلى شكر المطربين أوكا وأورتيجا، وطاقم العمل الخاص به.

واختتم خاطر: "شكر منفرد متفرد لأخويا وصديقي وصاحب العمر النجم محمد أنور، أنا بشكرك مش على تمثيلك بس أنا بشكرك علي كل لحظه كنت واقف جمبي فيها وحبك للمسلسل واهتمامك الزايد بكل التفاصيل ونعم الأخوات".