ناشد أهالى شارع إسماعيل الحبروشى بميت عقبة بمحافظة الجيزة، المسئولين لإزالة الأشجار العتيقة فى الشارع، والتى يتوقع سقوطها فى أى وقت مما قد يودى بحياتهم، مطالبين مسئولى الحى إنقاذهم من هذا الخطر الذى يهددهم كل لحظة أثناء خروجهم للعمل أو الوقوف بالشارع، إضافة إلى القلق الذى يلازمهم على أطفالهم.
قالت «أم محمد»: «أنا بوابة وأوضتى متعرشة بالخشب ومفيش سقف يحمينا، وعايشين تحت الشجرة لو وقعت فى أى لحظة هتموتنى أنا وعيالي، ولا عشان إحنا غلابة محدش مهتم بينا، والحى كان هنا بيزيل شجرة، لكن لم يقم بإزالة الجزء الواقع فوق غرفتي، وعندما طلبت منهم قطع التانية عشان دى خطر علينا وعلى الأهالى قالوا: «لما تقع هنيجى ونشيلها» لو وقعت وحدها هتتسبب فى موت حد فينا، أو إتلاف أى شىء تحتها وأولهم أوضتى أنا وعيالى، وطول الوقت أنا بخاف على عيالى يطلعوا يقع عليهم فرع أو يصيبهم أذى منها.
يقول «عم محمد» ٥٠ عاما وأحد سكان الشارع: « الشجرة لو وقعت علينا هتموتنا، وقدمنا بلاغًا أكثر من مرة، ومحدش سأل فينا، بقينا بنخاف نقرب منها غير أن الفروع كل فترة بتقع منها، وأكثر من مرة فى ناس كانت هتموت بسببها، ومن سنة وقع فرع علينا وأتلف عربيات الناس، وإحنا مش عارفين نعمل إيه، ونناشد المسئولين من أجل هذه الكارثة التى ستتسبب فى أذى الكثير أولهم أنا وأولادي، مفيش حد من المسئولين بيسمع صوتنا علشان إحنا غلابة.
