تلقى مكتب النائب عبدالرحيم على، عشرات الشكاوى من مواطنين قالوا إنهم يقيمون بالعشش منذ سنوات وأن أسماءهم لم يضمها كشف التوزيع الحالى.
ووجه النائب عبدالرحيم على، بضرورة إثبات صحة تلك الشكاوى بمستندات رسمية كشهادات ميلاد الأبناء، مثبت بها العنوان الذى يؤكد أحقيتهم، ووعد النائب باتخاذ خطوات عملية من خلال السيد محافظ الجيزة ورئاسة حى الدقى والتضامن الاجتماعى لإعادة بحث المتظلمين وفرز من يستحق ومن لا يستحق تمهيدا لتعويضهم، وقالت «أم شيماء» إحدى سكان العشش: «طول عمرى عايشة هنا وأنا أحق من أى حد وقدمت ورقى وما استلمتش، أروح فين أنا وعيالى، الناس جت من برة خدت مساكن وهما مش من المنطقة خالص، الله أعلم خلصوا الورق إزاي».
وأضافت: «فيه ١٧٠ حالة ما استلموش، ومش عارفين نروح لمين ولا نكلم مين، ومصيرنا إيه، أنا لجأت للنائب عبدالرحيم على علشان يوصل صوتنا، إحنا ما قلناش لأ للتطوير وبناء مساكن محدش يكره الخير لكن الخير يروح لمستحقيه لأهل العشش مش لحد من برة المكان خالص، هيستلم الشقة ويقفلها ويمشى».
أم بسمة ٦٠ عاما تقول: «فتحت عينى على الحياة فى العشش تزوجت وأنجبت داخلها، إزاى ما استلمش، فى واحد من الحى إمبارح جه ودخل عندنا وشافنا قاعدين فى البيت وبنغسل، ورغم ذلك عمل علامة إكس يعنى مش موجودة فى البيت عشان يضيع حقى فى الشقة بيعلموا بمزاجهم».
فيما وجهت بسمة رشاد ٣٠ عامًا، نداءً للرئيس السيسى، قائلة: «بوجه صوتى لسيادة الرئيس، الناس الغريبة أحق مننا فى إيه عشان يا خدوا شقق وإحنا مناخدش، ناس من أبوالنمرس وناس من الصعيد، جاية تاخد شقق وإحنا مخدناش طب شوفوا بطايقنا اللى على السكة الحديد حى الدقى مش البطايق بتثبت ده، أبوس رجلك يا سيادة الرئيس إحنا بنحبك وانتخبناك وبنحترم قرارات التطوير بتاعتك لكن انظر فى أمرنا».
رضا أحمد ٦١ عامًا، يقول: «يا سيادة الريس إحنا دعمناك ونزلنا انتخبناك وبنحبك وأنا زغردتلك ورقصتلك، إحنا مش رافضين التطوير لكن عاوزين حقنا نصف الأسر خدت شقق والنصف التانى مرمى فى الشارع».
