«الحال كما هو عليه، أسقف البيوت تقع ومياه المجارى تحاوطنا»، بتلك الكلمات البسيطة الممزوجة بالحزن والبؤس، عبر عدد من أهالى منطقة عشوائيات الدقى عن معاناتهم من تأخر استلام الوحدات السكنية الجديدة حتى الآن، الأمر الذى وصفه البعض من أهالى المنطقة بمأساة يعيشونها يوميا ولا تنتهى.
وعن تفاصيل المأساة التى يعيشونها يوميا يقول محمد عواد: «مشكلة مياه الصرف كل يوم بتزيد وأنا خايف تحصل كارثة أكبر، معظم البيوت هنا غرقانة بمياه الصرف الصحى ده غير الرائحة اللى مفيش بنى آدم يتحملها والحشرات والتعابين اللى بتزحف على البيوت». وتقول منى عبده، من أهالى المنطقة: «نفسى فى بيت آدمى يأوينى أنا وأمى وأخواتى، نفسى فى دورة مياه بدل ما بنروح الجامع علشان نستحمى، وبناشد الحكومة والمسئولين يبصوا لنا بعين الرحمة، دى أقل حقوقنا إننا نقعد فى مكان نظيف».
