“,”المواطن الغلبان حسن حصاوي يغشى عليه من حين لآخر.. وعندما يفيق لا يفهم ما حدث حوله من تغيرات“,”..
“,”حصاوي يدخل المقهى ويجلس بجوار جاره“,”
الجار: معلش يا حصاوي مش هقدر أقعد معاك النهار دا.
حصاوى: ليه؟ خير؟.
الجار:خير.. رايح أخطف رجلي لحد غزة وراجع في نفس اليوم.
حصاوي:طب أقعد وفهمني رايح ليه؟.
الجار:أقول لك الحق رايح أستورد من عندهم بضاعة وأسوّقها في مصر.
حصاوي:بضاعة زي إيه؟
الجار:رايح أجيب سولار وبنزين.
حصاوي:بس أنت ما عندكش عربية.
الجار:آه.. بس بعد ما أشتغل في تجارة السولار والبنزين هيبقى عندي عربية.
حصاوي:مش فاهم.. هي غزة بتنتج سولار وبنزين أرخص من اللي عندنا؟
الجار:لأ.. بس بييجي لها سولار وبنزين وأرخص مننا.
حصاوي:غريبة.. منين؟.
الجار:أنت حمار يا حصاوي؟ من مصر طبعًا.. هيكون منين؟.
حصاوي:لأ فهمني دي بقي.
الجار:بتروح لهم متهربة من الأنفاق اللي بيحفروها من عندهم لحد عندنا في سينا.
حصاوي:آه.. أنا سمعت حاجة زي كده.
الجار:أنا رايح غزة أقف قدام الأنفاق اللي عندهم أشتري كام جالون سولار على كام بنزين من اللي متهرب لهم وأرجع مصر أبيعه بضعف التمن.
حصاوي:برضه مش فاهم ليه ما تجيبش السولار والبنزين من مصر.
الجار:ممنوع.
حصاوي:أفندم؟ عشان إيه؟
الجار: لأنه مدعوم من الحكومة وبتبيعه للمواطنين بسعر رخيص.
حصاوي:طب ما تشتريه من الحكومة ما دام رخيص.
الجار:بيقف أغلى.. أصل موظفين الحكومة عندنا بيدوا كميات لتجار يبيعوه في السوق السودا.. ومنها كميات كتيرة بتروح لغزة، وعشان كده الناس مش بتلاقيه.
حصاوي:طب ما هو كده هيبقي تمنه في غزة أغلى برضه.
الجار:بالعكس هنا أغلى لأن محدش لاقيه، لكن في غزة مرطرط.
حصاوي:وحكومتنا ساكتة على كده؟.
الجار:خلي بالك مصر عليها دور عربي ومسئوليات قومية ما تقدرش تتخلى عنها، وما تنساش إن الفلسطينيين غلابة.
حصاوي:طب ما إحنا برضه غلابة.
الجار:وإحنا إيه وهما إيه يا حصاوي؟ ما إحنا واحد يا جدع، وبعدين هما يا ما ضحوا عشان خاطر مصر، ولا نسيت؟
حصاوي:الحقيقة مش فاكر، أنت عارف أن ذاكرتي بعافية.
الجار:أبقي أقرا التاريخ كويس وأنت تعرف، خلينا في المهم، تشاركني؟
حصاوي:قُلي أزاي.
الجار:بعد ما نعبي السولار والبنزين من غزة نرجع مصر عن طريق النفق
حصاوي:طب ما نخلينا في بلدنا ونشتريه من الأنفاق وهي جايه.
الجار:هيبقى تمنه أغلى لأن لو حد فلسطيني هرب لنا السولار بتاعنا لحد عندنا هياخد عمولة غير ضريبة غزة.
حصاوي:ضريبة إيه؟ هي مش متهربة؟
الجار: أيوه ما هو أصل منظمة حماس بتاخد ضريبة عشرين في المية على أي حاجة متهربة لها أو متهربة من عندها.
حصاوي:ودي ضريبة شرعية؟
الجار:لأ.. بس حقها لأن هي اللي بتسمح بحفر الأنفاق وبعدين كله رايح للقضية الفلسطينية.
حصاوي:لكن حماس خلاص وقفت الضرب على إسرائيل.
الجار:بس لو منظمة فتح وإسرائيل أتفقوا ووصلوا لحل الدولتين. حماس مش هتسكت وساعتها تحصل حرب تانية بين فتح وحماس.
حصاوي:برضه لو جبت السولار والبنزين من مصر مش هتتعرض لخطر القبض عليك.. وأنت راجع في النفق.
الجار:بالعكس لو حاولت تجيبه من مصر ممكن الحكومة تسجنك أو البلطجية تقتلك.. لكن ترجع عن طريق الأنفاق هتدفع الضريبة لحماس، ما حدش يكلمك لا هناك ولا هنا، وبعدين قُلي بقى أنت عايز تزعل حماس مننا ولا إيه؟
“,”حصاوي يغشى عليه“,”
