الغسيل القذر لقيادات الطابور الخامس!
مصطفى النجار لنجل شقيقة البرادعي: «هانجيب (البوب) رئيس لمصر وربنا يسامحنا على اللى بنعمله فى الناس»
نائب الرئيس «الهارب» يصف المعارضة بالزبالة ويطلب من أخيه علي: لازم نقفل اليوم السابع
العريان أشاد بأداء حمزاوى ضد المجلس العسكرى وعندما طلب الأخير مقابلته رد: خلينى أرجع للكتاتنى ومرسى
«التجارة شطارة» هكذا يقول المثل الشعبى الدارج، لكن فى بعض التجارة خيانة، عندما يكون الثمن هو دماء الناس وأرواحهم الزكية، وعندما يكون المباع هو مستقبل الوطن واستقراره، يمكنك أن تقول بلا أدنى تردد «خسر البيع».
بعض النشطاء السياسيين عمل خلال الفترة الماضية بمنطق «ثلاثة أرباع المكسب فى التجارة» فتاجر فى كل شيء وباع أى شيء لكن بأبخس الأثمان، شعروا بأنهم خارج نطاق المساءلة، ومن أمن العقاب أساء الأدب، لكنهم لم يسيئوا الأدب وحده، وإنما أساءوا للتاريخ وسعوا للعبث به.
التسريبات التى نشرها برنامج الصندوق الأسود، لنخبة من هذه الشخصيات العامة والنشطاء، وأفراد قدموا أنفسهم وعرفهم الشعب المصرى فى أحداث 25 يناير وما بعدها، باعتبارهم ثوارا، هزت الوسط السياسى والشعبى المصرى، فمن وثق فيهم الشعب استغلوا معاناته فى الوصول لأغراضهم وتنفيذ مخططاتهم، التى كانت جميعها تصب فى صالح أجندات غربية.
الغريب أن تلك الوجوه والأصوات بدأت تطل علينا مرة أخرى، مستغلين الحكم القضائى ببراءة الرئيس الأسبق، محمد حسنى مبارك، تارة، وقرب الذكرى الرابعة لثورة 25 يناير تارة أخرى، لتعد المصريين بثورة جديدة، نفس السيناريو يتكرر مرة أخرى وبنفس الأدوات، لكن هل يلدغ المصريون من الجحر مرتين؟!
فى هذه الحلقات نذكر المصريين ونذكر أنفسنا، بهوية هؤلاء الثوار، وأجنداتهم ومؤامراتهم وشركائهم، لعل الذكرى تنفع المصريين.
فى هذه الحلقات، التى نوالى نشرها تباعا، يتحدث عمرو حمزاوى، باحث وكاتب مصرى، أستاذ العلوم السياسية بجامعة القاهرة، وأستاذ السياسة العامة بالجامعة الأمريكية فى القاهرة، إلى عصام العريان، مسئول المكتب السياسى لجماعة الإخوان الإرهابية، فيشيد العريان بحمزاوى، ويحييه على عمله الذى يؤديه ويشكره حمزاوى، ويقول له: أنا نفسى حزب مصر الحرية يقعد معاك، ومع الدكتور الكتاتنى والدكتور مرسى علشان ننسق المواقف. ويرد عليه العريان استنى يا عمرو لما أنسق مع الكتاتنى ومرسى علشان مش عارف ظروفهم إيه.. ممكن على يوم الثلاثاء القادم، إن شاء الله.
البرادعى ومكالمات تكشف الحقيقة الغائبة عن كثيرين، حيث يتحدث مع أخيه على البرادعى قائلا له فى المكالمة الأولى: أيوه يا على أوقات بتبعتلى مجموعة زبالات زى الكويتى.. ابعته لأحمد عزت.. فيرد عليه أنا بعته والراجل بتاع الكويت ده دماغه فاضية مش تبعت تانى أنا مقدرش أقابل حد لوحدى، وبخصوص شباب البيزنس والغداء والعشاء ممكن أروحه، وموضوع الهبل اللى مسميينه الحوار الوطنى، عايدة مراتى بتكلمنى وبتقولى لو الدكتور محمد ييجى بكره الساعة 6 بعد الضهر قلتلها عنده مقابلة مع وزير خارجية الهند وهوه مش فاضى.
واللى اسمه المرازى طلب منها إنه يقابلنى وقال 20 واحد من رموز مصر هتساهم فى مناقشة الحوار الوطنى، رموز مصر ديه يعنى زبالين مصر ويحيى الجمل هوه اللى بيرأس الجلسة قال يعنى، الخلاصة أنا مش هقعد مع ناس زى ديه، دول ناس مش فاهمين راسهم من رجليهم يعنى هيعملوا حوار وطنى بـ 160 نفر.. ديه حاجة بيعملوها زى أيام عبدالناصر فاكر دي حاجة مش تصلح البلد، ولا يمكن أطلع مع 20 رموز هتلاقى الصباحى وعمرو موسى وأيمن، وأشكال ملهاش لازمة من دول. أنا مش عايز أقرب من الشخصيات الزبالة ديه.. دول ملهمش أى قيمة.. الجيش بيشتغل لوحده وأنا كمان بشتغل لوحدى.. أنا فى تويته واحدة أو حوار تليفزيونى أبقى أعلق عليه ده حوار بيضحكوا بيه على عقول الناس.
مكالمة أخرى لأسماء محفوظ تتحدث فيها مع شخص مجهول تعرفه جيداً، أطلعته أنها فى اجتماع فى أكاديمية التغيير ومقرها لندن وأكاديمية لندن SOS، وحاضرة الاجتماع من 8، وأنها تحتاجه لمساعدتها فى حوار، وقالت له لازم تساعدنى أعمل مؤسسة للتغيير فى مصر، واتفقوا على الكلام عن ذلك فى صباح اليوم التالى.
مكالمات لمصطفى النجار يظهر فيها تعمده تشويه زملائه من أجل «السبوبة»، وتعاونه هو ومحمود الحتة المسئول الإعلامى لحملة البرادعى وتزوير فى ملفات وتقارير أمن الدولة لعبدالرحمن سمير، كما ظهر فى حديثه مع أحمد شكرى عن «الفلوس اللى جاية من برة»، تسريبات أخرى عن غراميات عبدالرحمن يوسف النسائية، والذى يتحدث عن طلعاته لقطر لكى «يلقط رزقه».
وائل غنيم الذى كان مجرد واجهة ومسوِّق للثورة لصالح الإخوان كما قال محمد عباس، والذى أعلن انسحابه وإنه «مالوش دعوة بحاجة» بعد سيطرة الإخوان وبعد ما سلملهم البلد، ومكالمة حبارة التى يعترف فيها بأنه نفذ مذبحة رفح وأنه «عايز فلوس عشان سلاح للإخوان»، محمد مرسى «أى حد من طرفك أنا تحت أمره».. إنه الشاطر ومكتب الإرشاد الذى يحكم.
لقطات ومشاهد عندما تجمعها بجانب بعضها يتضح المشهد، مشهد مؤلم ودام لأناس باعوا الوطن بثمن بخس، ثم عادوا إلى التجمع مرة أخرى معتقدين أن الوقت قد حان لعودتهم، لكننا أبدا لن نسكت.
البرادعى لأخيه: لازم نقفل اليوم السابع
البرادعي: أيوه يا على إزيك
على: صباح الخير إزيك يا محمد
البرادعي: الحمد لله آه الراجل سفير تركيا كان بيتكلم دلوقتى.. ومش عارف هيجى لهم بكرة رئاسة الجمهورية
على: آه وعاوز إيه يعنى
البرادعي: المهم هاقبله شاكر
على: إيه إيه كان عايز.. إيه
البرادعي: آه زى الجمعية الوطنية والزبالين
على: آه.. لأ لأ
البرادعي: قولت له مش حقابله.. أنا عايز أقابله..المهم كان عايز نعمل كونتكت مع الشباب.. وعايزين نجبله شوية شباب قولت له بتوع الائتلاف
على: نجيبله عبدالرحمن سمير
البرادعي: آه عبدالرحمن سمير.. أنا هديك نمرته.. وتبعت له نمرة عبدالرحمن سمير
على: طيب أوك
البرادعي: وبعدين كلمنى دلوقتى السفير الإسبانى
على: هااااا
البرادعي: بيقولى الوزير الخارجية بتاعهم جاى يوم 13
على: آه.. وقولت له حتبعت له الإيميل بتاعي
البرادعي: آه آه.. ده صاحبى.. وقولت له هبعت لك الإيميل بتاعه
على: آه آه ما هو دول بيخدوا وقت
البرادعي: آه طبعًا مشاوير.. لا والأجانب دول يعنى قصدى دلوقتى المهم دول معندهمش حاجة يضيفوها.. ده «مرتيونس» ده وجول صحابى يعنى قصدى العملية مهياش سايبة
على: كويس لا قصدى بتاع تركيا ده مهم وصور وكده هتبقى مهمة
البرادعي: آه آه.. المهم ده وزير خارجية.. وأنا قولت الاتنين كويسين جدا
على: آه محترمين.. وهديك عايده هتكلمك
البرادعي: طيب أوك.. واليوم السابع دول ناس معرفش.. أنا مشفتش كاتبين إيه بس شفت العيال شاتمين فيهم
على: بيشتموا فيهم.. بصيت لقيت كام واحد كده بيشتموا فيهم
البرادعي: كاتبين إنى أنا قلت إن لازم حكومة شفيق تتغير.. وإنى ببص لمصلحتى الشخصية ومش مصلحة الوطن
على: شوف ولاد الكلب
البرادعي: ها وبعدين فى نفس الخبر بعدها قالوا إن الجنزورى ممكن يكون رئيس جديد.. وحتى أى واحد أو اتنين مابصتش كده قالوا لهم منين بتقولوا هيتعين ومنين بتقولوا هيتعين رئيس وزارة جديد
على: دول يعنى إيه.. دول بتوع مخابرات
البرادعي: ده بتاع صفوت الشريف
على: أيوه ماحد قالهم على صفوت الشريف نفسه
البرادعي: أوك يا على
على: عايده معاك
مكالمة البرادعى مع أخيه تعكس نوعا من السخرية من النخبة والشعب المصرى باستخدامه كلمة «مصر دى زبالين»... كما تعكس مدى تناقضه مع نفسه وأمام الشاشات عما يكمن فى نفسه. كما يدل أيضاً مدى التعالى الذى ينظر به إلى الوطن والسياسيين كأنه الوحيد فى مصر الذى يفهم.
نذكر أيضاً فى هذا السياق مكالمة مصطفى النجار لمروة: «البوب هيدفعلك 2000 دولار وتشتغلى معانا»، مما يدل على حجم الدعم الكبير الذى يتلقاه البرادعى، وسعيه بكل قوة لاستخدام الشباب وإغرائهم بالمال من أجل تحقيق مبتغاه كما فعل فى العراق.
الشعب المصرى لم يعرف البرادعى جيداً، فكما أوردت صحيفة «ذى نيوز» الإنجليزية الباكستانية، مقالاً خطيراً للعالم النووى الباكتسانى عبدالقادر خان، صاحب أول قنبلة نووية إسلامية والمطلوب الأول أمريكياً، تحت عنوان (Danger to Egypt.. Random thoughts) أى (خطر يحيق بمصر.. أفكار غير مرتبة) يؤكد فيه أن البرادعى عميل زرعه الغرب فى مصر، وأن أشد الأخطار التى تحاصر مصر هى وصول الخونة إلى مراكز السلطة.
وأشار إلى أن الغرب عندما فشل فى غزو مصر عسكرياً، زرع الخونة بمراكز السلطة والمسئولية منذ زمن، حتى يظهر تأثيرهم على المدى الطويل، مؤكداً أن أحدثهم هو الدكتور محمد البرادعى عميل المخابرات الأمريكية «CIA» المخلص. فإن سياسة الغرب بتأهيل الخونة ليصلوا إلى السلطة بعد سنوات وفى الوقت المناسب، سياسة متبعة مع الدول التى لا جدوى من العدوان المباشر عليها.
فالحكومات الغربية زرعت عملاءها فى البلدان النامية فى المناصب الرفيعة والمنظمات العالمية، لتسهيل أداء دورهم من التأثير فى بلدانهم أو تخريبها إذا لزم الأمر، لذلك استخدم الغرب الدكتور محمد البرادعى فى العراق وأراد أن يستخدمه فى مصر لحماية وتعزيز المصالح الغربية - الإسرائيلية.
واشنطن تثق بـ«رجل الغرب» البرادعى، وإلا ما كان ليتولى منصب رئيس الوكالة الذرية، فقد كان خلفاً للسويدى وزير الخارجية سابقاً الدكتور هانز بليكس، الذى كان أيضاً جاسوساً نشطاً لواشنطن، وكان له دور أساسى فى كتابة تقارير غامضة ومؤذية لحرب غير مشروعة فى العراق، فذبح أكثر من 100 ألف من المدنيين الأبرياء، ولايزال القتل هناك مستمراً، وفى أفغانستان، ومع ذلك توج أوباما مشوار البرادعى بجائزة نوبل للسلام!
وقالت الصحيفة: «كلما عاد فريق الوكالة من التفتيش والبحث عن أنشطة تتعلق بإنتاج الأسلحة النووية فى العراق، قال بليكس فى تقريره: إن المفتشين لم يجدوا دليلاً على وجود برنامج للأسلحة النووية، ولكن هذا لا يعنى أن مثل هذا البرنامج لا وجود له». وهو ما كان يفعله بناءً على توصيات سياسية أمريكية، وفقاً للصحيفة.
وأكد أن البرادعى الذى خدم الوكالة الدولية والمصالح الأمريكية لمدة ثمانى سنوات، تلقى إشارة خضراء لتولى فترة رئاسة ثالثة بعد اجتماع مع كونداليزا رايس، وزيرة الخارجية، وبعد أن وافق وصدق على جدول الأعمال الأمريكى فى باكستان وإيران بدعوى برامجهما النووية. واتهم خان البرادعى بإصدار تصريحات مؤذية وكاذبة عن البرنامج النووى الباكستانى، وحتى الأيام الأخيرة من ولايته.
واتهمت الصحيفة البرادعى بإصدار تصريحات مؤذية كاذبة عن البرنامج النووى الباكستانى، وحتى الأيام الأخيرة من ولايته اتهم إيران بعدم الوفاء بالتزاماتها تجاه معاهدة حظر الانتشار النووى، وقرارات مجلس الأمن الدولى، بالرغم من توقيع إيران على معاهدة حظر الانتشار النووى وسماحها للزيارات المنتظمة من قبل مفتشى الوكالة الدولية إلى جميع المواقع النووية، ولكن هؤلاء المفتشين لم يعثروا مرة واحدة على ما يدين إيران.
وأفضل مثال لكى نعرف قدرات وأجندة البرادعى، هى من أقرب الناس إليه ورفقائه فى الخيانة، من مصطفى النجار، ونذكر مكالمته الشهيرة:
النجار لـــ«شكري»: هنجيب البرادعى رئيس وربنا يسامحنا
مكالمة تليفونية دارت بين كل من الناشط السياسى مصطفى النجار، والدكتور أحمد شكرى، ابن أخت الدكتور محمد البرادعى، مستشار رئيس الجمهورية السابق.
شكري: آلو
النجار: دكتور أحمد شكري
شكري: حبى.. طمني
النجار: فاتتك قعده تاريخية
شكري: ياااه بقى متقعدش تعذبنى.. قولى إيه اللى حصل
النجار: مفيش جديد عادي
شكري: إيه يا عم أنا كلمت عبدالمنعم قالى إيجابية جدًا وبتاع
النجار: الواد عبدالمنعم ده سطحى آخر حاجة.. وفعلاً أنا بفكر أمشّيه من الحزب عشان منفوخ منه
شكري: بقوله إيه الأخبار؟ قالى أنا فى المواصلات.. ومش هقدر أتكلم.. قولتله يعنى إيه إيجابية.. قالى آه إيجابية جدًا جدًا
النجار: لا.. بص هو أهم حاجة وصلنالها أقنعته إن إحنا لازم نلعب سياسة ونبقى برجماتيين
شكري: صح كده
النجار: تمام.. طيب.. فقولتله إحنا دلوقتى عمرو موسى رايح جاى.. نقعد معاه ونسمع منه مفيش مشكلة.. بس كده كده إحنا مش انفولدد معاه.. ولكن
شكري: الكلام على مين
النجار: عمرو موسى عايز يتغدى معاه.. قولتله اتغدى معاه متتغداش معاه ليه!
شكري: آه بالضبط
النجار: آه قولتله مرشد الإخوان نقعد معاه نشوف أولهم وآخرهم إيه.. ومعانا ولا مع عمرو موسى
شكري: آه
النجار: الحاجة التانية إحنا دلوقتى مين اللى موجود نستوعبه.. هشام البسطويسى عايز يبقى ريس تعالى.. هشام بسطويسى أنت هتبقى نائب الريس
شكري: آه
النجار: أحمد زويل تعالى أحمد زويل إنت كده كده الدستور بيقول إنك متنفعش ريس ولا نائب ريس فتعالى رئيس وزراء
شكري: آه
النجار: واخد بالك.. فاقتنع البوب الصالح قالى إبدأ اتصالاتك
شكري: تمام.. فاااا هنبدأ اتصالاتنا
شكري: ها
النجار: عايزين مدير وبتاع وكلام كده.. فقولتله والله مفيش
شكري: إيه.. هتبدأ اتصالات إيه؟
النجار: أكلم بقى هشام وأكلم الناس ديه يعنى.. وأبو الغار هيكلم زويل
شكري: آه
النجار: وهنشوف بقا
شكري: حلو
النجار: فاهمنى أنت الديل دوت
شكري: تمام
النجار: يعنى عشان لما نعمل المؤتمر الصحفى للترشح للرئاسة نلاقى زويل واقف جنبه نلاقى فاروق الباز نلاقى هشام البسطويسى وإحنا يبقى كده خلصت
شكري: تمام تمام
النجار: بس.. والله العظيم يا ميدو يعنى هنجبهولك رئيس يا ميدو.. هنجبهولك رئيس بس يعنى ربنا يسامحنا يا ميدو
شكري: جبت سيرة الحزب ولا مجبتش
النجار: لا لا مجبناش سيرة الحزب خالص.. بس بسرعة قولتله إحنا كده كده شغالين فى موضوع الحزب، ولازم كده وده مش حزب البرادعى وأكدت عليه كده.. بس فى البلاااالة يا عم على يا عم.. يخرب.. أبوس إيدك والنبى خلى على يسافر
شكري: ليه بس قاله إيه.. قال إيه؟
النجار: مفيش يا عم لسه بيفكر بنفس الشكل الغلبان قوى.. مسكين يا أحمد مسكين
شكري: اللى هو إيه بس طمنى.. قولي
النجار: اللى هو كده.. الشكل اللى هو إيه طريقة التفكير نفسها
شكري: زى إيه يعني
النجار: بشكل عام يا أحمد
شكري: اللى هى طب شوفوا كده.. صح؟
النجار: آه آه اللى هو مفيش كده طب نعمل إيه.. قولتله لا.. هجيب مروة.. مروة مفرغها
شكري: آه
النجار: مروة مفرغها تيجى تخدلها 2000 دولار فى الشهر.. تقعد تعملنا كده.. بيقولى واحدة اسمها جليلة عايزة تساعدنا وبتاع.. قولتله بص ولا جليلة بلا جليلاشى.. مروة.. قولتله مروة راحت معايا مركز المعلومات واتخاذ القرار.. البنت قعدت هناك ثبتت كل الناس.. العلم اللى عندها والكلام اللى عندها يعنى محدش فى مصر عنده للأسف يعنى.. والله العظيم يا أحمد.. قعدت معاهم يخرب بيت كده.. الناس دى وقعوا يعنى بس.. فقولتله بس على الله أصلاً مروة ترضى أصلاً
شكري: دلوقتى أنت رايح العاشرة مساءً.. ولا رايح فين
النجار: اااا لا أجلنا العاشرة مساءً لبكره.. قلنا نستنا ونشوف تطور الأحداث ايه.. ضربوا الناس عند لاظلوغى جامد على فكرة
شكري: ااه بس فى كلام أن اللى هناك ناس بلطجية.. مش بلطجية ناس من المنطقة يعنى ناس كده على تويتر
النجار: مش عارف لسه هنتأكد
شكري: أنت رايح فين رايح فين
النجار: أنا فى أكتوبر دلوقتى روحت البيت.. عشان أقعد أكتب كام مقال كده وقاعد أكتب الرموز الحزبية اللى هنخدها معانا
شكري: لا لا عايزين نتكلم فى موضوع الحزب ده ضرورى.. فيه حاجات كتير إحنا أنجزناها امبارح وفى حاجات عايزين نعرف الخطوات يعني
النجار: طيب ما تخلص شغلك وبتاع وتكلمنى متأخر شوية.. ساعة كده ولا حاجة أدخل البيت أقلع هدومى وكده يعني
شكري: ماشى ظبط نفسك كده وادينى رنة وأطلبك أنا.. فى حاجات دلوقتى.. وحاجات إحنا وصلنالها امبارح.. ونحط شوية نقط على الحروف وكده وخلاص.. ماشي
النجار: طيب ماشى ماشي
شكري: بس خلص فضى نفسك كده وادينى رنة
النجار: طيب
شكري: حاول تستعجل سلام.
إنهم نشطاء ارتدوا ثوب الوطنية والديمقراطية والحريات، لكنهم فى المقابل، كانت أياديهم ملوثة بدماء الأبرياء ومدنثة بأموال الغرب، لا يعنيهم فقط سوى أنفسهم.
هشام مرسى لـ«مصطفى النجار وأحمد شكري»: «الفلوس هتوصل يوم الإثنين»
تسريب من نصيب النائب السابق مصطفى النجار، وأحمد شكرى، مدير حملة البرادعى لرئاسة الجمهورية، يجمع بينهما وبين هشام مرسى، رئيس أكاديمية التغيير بقطر، وزوج ابنة الشيخ القرضاوى، حيث يكشف دورهم فى تمويل نشطاء السبوبة بمصر من أجل تنفيذ مخطط الشرق الأوسط الكبير بمصر، ودور أكاديمية التغيير فى دفع تكاليف الحملات الإعلانية والتسويقية لمنتجات إعلامية ومقالات منشورة بغرض تشويه المناخ السياسى المصرى، والإضرار بالأمن القومى المصرى والحصول على تمويلات خارجية.
مصطفى النجار: أيوه يا هشام
هشام مرسي: مصطفى إيه أخبارك
مصطفى النجار: إيه الأخبار
هشام مرسي: أنا بخير طمنى عليك
مصطفى النجار: الحمد لله فى مصر ولا برا مصر
هشام مرسي: برا مصر راجع يوم الاثنين إن شاء الله
مصطفى النجار: تيجى بالسلامة أنا بس رجعت ومكنتش شفت الخطة بتاعت االلل
هشام مرسي: التسويق والشغل بتاع شادى وكده.. أنا بس لفت نظرى فى الأسعار وكده حاجات معينة أنا مش قادر أفهمها يعنى ااااه
مصطفى النجار: زى إيه قولي
هشام مرسي: زى مثلا الأفلام الوثائقية اللى هى مدتها دقيقة دى أو الإعلان ده
مصطفى النجار: اااه
هشام مرسي: هو ده هيبقى على النت صح هيبقى على النت مش يعنى هيتحط فين إيه.. الميزة اللى هو هيتحط فيها مش على النت وبعد كده لو عوزنا نعمل تليفزيون منها ممكن يتعمل منها فترة تليفزيون
مصطفى النجار: اااه
هشام مرسي: هو لا فيه أرقام كبيرة يعنى أنا من خلال معرفتى من حاجات معينة فى الإعلام فى أرقام كبيرة فى أرقام مبالغ فيها بفلوس كتير فااااا ده مريحنيش.. يعنى يعنى معرفش دا مريحنيش يعنى هو ماشى شادى ياخد فلوس وياخد كل حاجة بس فى حاجات مش منطقية خالص يعنى بالتفصيل حتى وريت الكلام دااا لبعض الناس كانوا بيسألونى فاندهشوا أوى من أرقام مع الحاجات اللى هتطلع.. فأنا برضه عشان أكون أمين معاك طلبت منهم إنهم يبعتولى تقييم بالكلام دوت من ناحية بس عروض الأسعار وهبعتهولك ومش هوقف حاجة أو نبوظ حاجة عشان نبقى عارفين.. إحنا بنتعامل مع مين ونشوف نفسنا لأن كل قرش إحنا أولى بيه يعنى
مصطفى النجار: طبعًا تمام طبعًا.. فأنا هعمل ده وأحاول ابعتهولك خلاص على النهارده بالليل إن شاء الله
هشام مرسي: خلاص يا ريت
هشام مرسي: وغير كده إيه الأخبار تانى
مصطفى النجار: الدنيا كويسة وإحنا فى المقر.. الشباب مستمعين وأنا قاعد أنا وأحمد شكرى دلوقتى
هشام مرسي: هو ساب لى أحمد شكرى.. ساب لى مسد كول من شوية اعتذر له لأن أنا مكنتش رديت كنت لسه هرد له المكالمة.. فلو جنبيك وأقدر أكلمه بالمرة
أحمد شكري: أيوه هشام إزيك
هشام مرسي: أحمد إيه أخبارك كله كويس
أحمد شكري: الحمد لله
هشام مرسي: شفت المسد كول بتاعك بس كنت فى ظيطة وظمبليطة
أحمد شكري: هو بس كنت بكلمك عشان موضوع الفلوس دوت كان إبرهيم حمدى ومش عارفين نوصله
هشام مرسي: ما أنا مش عارف أعمل إيه ما المشكلة إنى أنا بره مصر كمان
أحمد شكري: انت جاى إمتى إن شاء الله
هشام مرسي: جاى يوم الاثنين إن شاء الله
أحمد شكري: طيب إن شاء الله حتى لو جيت الاثنين يبقى الثلاثاء الصبح.. بحيث نحسم الأمور كلها إن شاء الله
هشام مرسي: حاضر حاضر يعنى أنا مش عارف أنا إيه حكايته أنا عملت اللى عليّا.. وفى سيستم ماشيين عليه مش عارف هو مختفى فين الحقيقة
أحمد شكري: اااه اااه طيب خلاص إحنا نتصرف لغاية ما تيجى
هشام مرسي: خلاص خلاص أوك.. بااااي
بوكسات :
= شكري: إيه يا عم الأخبار أنا كلمت عبدالمنعم قالى إيجابية جدًا وبتاع
= النجار: عايز لما نعمل المؤتمر الصحفى للبرادعى للترشح للرئاسة نلاقى زويل واقف جنبه نلاقى فاروق الباز نلاقى هشام البسطويسى ويبقى كده خلصت
= على البرادعي: الحمد لله آه الراجل سفير تركيا كان بيتكلم دلوقتى.. وهيجى لهم بكرة رئاسة الجمهورية
= محمد البرادعي: آه زى الجمعية الوطنية والزبالين اللى قعدتنى معاهم
= أحمد شكري: هو بس كنت بكلمك عشان موضوع الفلوس دوت
= هشام مرسي: إحنا لازم نبقى عارفين بنتعامل مع مين ونشوف نفسنا لأن كل قرش إحنا أولى بيه
