المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات، ولكن أحيانًا ما يجعل من يسمعه هو الذي يغشى عليه
(جار لحصاوي يطرق بابه صباحًا)
الجار:أنا بكلمك باعتباري عضوا في حزب الحرية والعدالة.
حصاوي:(مقاطعا) متأسف أنا خلاص مضيت على استمارة تمرد.
الجار:لا أنا جاي أدعوك تشترك مع أهل الحي لتصحيح صورة الشارع المصري أمام المجتمع الدولي كله.
حصاوي:أزاي؟
الجار:فكرت ما نعتمدش على حكوماتنا وناخد على عاتقنا المهمة دي.. وفيه وفد أوربي خاص بالبيئة جاي مصر قريب.. ودي فرصة نقدم صورة للشارع المصري مختلفة عن الصورة اللي في ذهنهم.
حصاوي:فعلا لازم نكون إيجابيين وما ننتظرش كل حاجة من الحكومة. بس نعمل إيه؟
الجار:ناخد من شارعنا نموذج للشارع المصري نعرضه على الوفد ده.
حصاويبس شارعنا حالته لا تسر عدو ولا حبيب. كفاية الزبالة وإشغالات الطريق
وشكل البيوت والغسيل المنشر في البلكونات والنفايات اللي فوق الأسطح واللي ممكن تتسبب في حرايق، يعني لو أي وفد أجنبي زارنا تبقى فضيحتنا بجلاجل.
الجار:فعلا دي صورة شارعنا حاليا، لكن آن الأوان نجمل الصورة دي.
حصاوي:آه إذا كان كده معلش.. أنا مستعد أساهم بكل اللي تطلبوه مني.
الجار:عظيم، كل واحد يدفع ميت جنيه بس.
حصاوي:أنا معاييش فلوس لكن أستلف وأدفعهم.
الجار:بارك الله فيك أما تجميل الصورة فدي مهمتنا، واللي مطلوب منك تفكر وتمدنا بمقترحاتك، بس تكون مقترحات عملية قابلة للتنفيذ وقدامك أسبوع.
حصاوي:بس كده؟ حاضر، أنا هبدأ العمل من دلوقت.
(بعد أسبوع)
الجار:أنت فين يا حصاوي؟ من تاني يوم كلمتك فيه اختفيت وسبت الشارع كله.
حصاوي: لأني يئست وقرفت ومابقتش طايق أقعد في الشارع وبفكر أعزل منه.
الجار:قول إنك هربت من المعركة.
حصاوي:بالعكس.. أنا طلبت من السكان ما يرموش الزبالة ويساهموا في مسح الشارع وكنسه.. وكل واحد يدهن بيته.. وطلبت المحافظة تخلي الباعة الجائلين يسيبوا الشارع.. ما حدش سمع كلامي، خدت مقشة ونزلت كنست الشارع بنفسي.. الناس قعدوا يضحكوا عليا.
الجار:مشكلتك يا حصاوي أنك كان مغمى عليك فترة طويلة، مقشة إيه ورصف إيه
ودهان إيه؟ دي حاجات محتاجة وقت وتكاليف.. إنما التطور التكنولوجي يحل لنا المشاكل دي كلها في ظرف ساعة مش أكتر.
حصاوي:التكنولوجيا تشيل الزبالة في غمضة عين وتشفط الهوا الملوث من الجو اللي حوالينا؟ فيه تكنولوجيا تقدر تخلي الباعة الجائلين يخلوا الأرصفة وتزرع لنا شجر بين يوم وليلة؟.
الجار:وإذا قلت لك إني قدرت أصلح صورة شارعنا فعلا.
حصاويتبقى عملت معجزة، لكن إزاي؟
الجارأدفع الأول الميت جنيه اللي كان مفروض تساهم بيها.
حصاوي:اتفضل آدي الفلوس.
الجار:واتفضل أنت كمان شوف دي إيه.
حصاوي:دي صورة شارع.
الجار:إيه رأيك فيه؟
حصاوي:شارع جميل جدا، لا فيه زبالة ولا أشغال طريق ولا فيها حمير ومليان شجر ع الجانبين والرصيف مسفلت وكل العمارات مدهونة، دا أكيد شارع في أوروبا.
الجار:أبدا دي صورة شارعنا بس بعد ما عملت له شويه رتوش وخدع بالكمبيوتر.
حصاوي:وهو الوفد الأجنبي لما ييجي هنفرجه على صورة؟
الجار:إحنا لقينا الأسهل، بدل ما نستقبل الوفد الأجنبي، نسافر له إحنا بالصورة.. وأهو منها نتفسح ونقضي لنا يومين في جو نضيف مش ملوث.
حصاويبس إحنا كده ما عملناش أي تحسين في شارعنا.
الجار:حد قالك إننا عايزين نحسنه؟ إحنا من الأول قلنا إننا عايزين نحسن صورة شارعنا.. مش نحسن شارعنا نفسه.. أنت هتفضل طول عمرك حمار يا حصاوي؟
( حصاوي يغشى عليه في الحال)
