يروي عم خالد تفاصيل حياته الصعبة لـ «البوابة نيوز»، قائلا: "حياتي اتدمرت بعد ما فشل مشروعي بسبب اضطهاد رئيس حي المنطقة التي أعيش بها، وكنت جايب تروسيكل وبعمل شاي وقهوة للناس، لكن هو قفله برغم ان في مشروعات غيري موجودة واستمرت".
وتابع عم خالد: "حكايتي بدأت وقت ما زوجة والدي أخدت مني ميراثي، وبعدين اشتغلت سواق لمدة 23 عام مع أحد السياسيين المشهورين لحد ما وضعه بقى مش تمام وسيبته".
وواصل عم خالد: "من وقتها وأنا ساكن في الشارع مش عندي شغل ولا سكن، وحالتي الاجتماعية "مطلق"، وعندي بنت عمرها 13 عام، ومش عارف أصرف عليها، وسيابها مع والدتها".
وأكمل عم خالد: "بفطر من بتاع الفول الصبح مجانا، وبشتغل سايس ويادوب بطلع مصاريفي بالعافية، لكن كفاية نظرات الناس لي في الشارع".
واختتم عم خالد: "أنا ليا 4 سنين عايش في الشارع، وناس كتير تعرفني لكن محدش بيساعد حد، وربنا عالم بظروف الناس، أنا مش عايز حاجة من حد غير اني يكون عندي شعل ومكان أعيش فيه يسترني، نفسي حد من المسؤولين يسمعني ويتولى حالتي، أنا مش محتاج غير شغل وسكن".
