تابع أحدث الأخبار
عبر تطبيق
كان نفسي اتولد فـ بلاد
تنفع قصيدة شعر
تحكي عن هموم الناس
مايبكوش
مايكونش زهد الحياة عليهم قدر
حتى الطبيعة بتشبه العيشة
الورد مالبسشِ شوك علشان ضعيف
الورد لابس خيش
في الليل عيال
بيلعبوا العرسان
العيشة خلتنا نخاف بكرة
فنشوف الترعة جيوب للأرض
يتحوِّش فيها اللي بيتسرسب من كف الرحمن
كان الزرع
بيشارك صاحبه صيامه
بيمسح ريقُه الندى في الفجر
ويستنى لحد الشمس ان دخل الليل
تتخبى وراه
النخل...
بيبص دايمًا ع البيوت من فوق
إكمنه اقرب للسما منهم
هو اللي عارف سرهم
الجوع رسول بيردهم لله
علّمهم..
يشق صدر الريح
ويكون مسيح.. بيحب أعداءه
لا ينكسر لكن....
ينحني لله تواضع
النخل لسه بيضربوه بالطوب
رغم انه حافر مكان في جلده للي طالع
ماكنّاش بنبخل بالنظر
كانت عنينا تسيب على النور؛
اللي جاي من طاقة في السموات.. أثر
الكلمة كلمة حق
حق الموت
إزاي هيدخل قلب اللي بات في المية
خوف المطر
بيزرعوا عشا للعيال والطير
ويرضوا...
إن صابهم الدور في التّرَفْ
أو لم يصيب
ويعلّموا الواد اللي استقَل الطين نصيب
قراطين تراب
شوف يعملولك كام بشر!