لبى نداء الواجب الوطنى ودفعه للعمل ضمن منظومة الفريق الطبى للجيش الأبيض بالمنيا دون النظر لأى مخاطر في مقاتلة العدو غير المرئى وذلك من أجل أداء رسالتة هو " الدكتور إبراهيم نافع شفيق سعيد" والذى أنهى فترة عملة داخل مستشفى العزل بعد أن قضى فترة خدمتة وهو يشارك زملاءه في تقديم الخدمة الطبية لمرضى كورونا بمستشفيات العزل.
سعيد من مواليد ١٩٩٣ خريج صيدله المنيا ٢٠١٦، ورئيس فريق مكافحه العدوى وعن تجربتة بمستشفيات العزل يقول " أنا من وقت بدايه الشغل في المستشفى وأنا متحمس للانضمام للعمل من أجل خدمة المرضى وفعل وهذه التجربة كانت من المحطات المهمة في حياتى لأنى شعرت بقيمة العمل والتضحية من أجل إنقاذ المرضى والسهر على راحتهم فكنت اقوم باستقبال الطقم الطبى من أطباء وتمريض وعمال وتدريبهم على إجراءات مكافحه العدوى،ومتابعة الالتزام بإجراءات الوقاية وتوزيع الجرعات الوقائية ومتابعه درجة حرارة العاملين بالمستشفى بصفة مستمرة وإعطاء تعليمات العزل المنزلى ومتابعة حالات التحول السيرولوجى من إيجابى إلى سلبى
وأضاف " من أهم الذكريات التى لن انساها كانت في شهر رمضان حيث كنت اشارك زملائى الصيام وانا مسيحى لكن كنت بصوم طول اليوم معاهم مكنش فيه فرق بين مسلم ومسيحى وحتى في العيد أكلنا كحك مع بعض وكان أكبر فرح لينا لما بنشوف خروج أكبر عدد حالات شفا من المرضى وعديت بحاجات كتير مختلفه مكنتش بنام ساعتين على بعض كان مطلوب منى أبقى صاحى طول الوقت وعنيا على كل الناس وفى مواقف صعب انساها منها حالات الوفاة إللى كنت بتضايق جدا لما أشوفها حتى لو حد معرفهوش ولما كانت تظهر نتيجة التحاليل والمرضى محتاجين يعرفوها ومضطر أقولهم آنها لسة إيجابية وقتها كأنى انا اللى
بسمعها وكان لازم اقولها بطريقة تحسن من نفسية المريض اكتر وكمان الضغط النفسى شديد جدا والمسئولية كبيره بس الكل بيضحى بأغلى ما عنده مقابل امتثال حاله شفاء واحده واحب اقول للناس إن الرسالة اللى بنحملها كأطباء ومكافحين للعدوى في كل مكان هى عقيدة وإيمان ومستحيل نتخلى عن واجبنا ده ورسالتى لزملائى في الأطقم الطبية"انتوا ابطال وجميلكم فوق دماغنا وكل التقدير ليكم طول الوقت وفى كل مكان ".
