وجه الدكتور محمد حسن هلال، أحد فريق عمل مستشفى حميات الإسماعيلية، رسالة للمواطنين، قائلًا: إن الفريق الطبي يعمل بأقصى طاقة لديهم بدون أي ضجيج أو شو.
وطالب هلال خلال تدوينة له عبر صفحته الرسمية على موقع التواصل الاجتماعي "فيس بوك" المواطنين قائلًا: "ادعو للناس دى بجد من قلوبكم ولجميع العاملين في حميات وصدر الإسماعيلية بالثبات والتوفيق".
وتابع: "الناس دى والله العظيم بتتعرض لخطر كبير جدا وبيقدموا تضحيات كبيرة على المستوى الفردى والجماعى وصدقونى عمرهم مافكرو في مصلحتهم الشخصية الناس دى خط الدفاع الأول وعمرهم ماهيسبوه".
وأضاف هلال: "متسمعوش لحد مغرض يقولكم الدكاتره بيستقيلوا وبيتركوكم، إحنا اعتراضنا على أوضاع شايفنها مش مناسبة فقط لاغير ودة لمصلحتكم في المقام الأول وده حفاظًا على الناس الموجودة دى في الصفوف الأمامية لمحاربة هذا الوباء اللعين بدل ما يقعوا واحد ورا التانى ومنلاقيش حد يدافع وإن شاء الله الناس المسئولة بتستجيب ومش مقصرين معانا وبيتفهموا الموقف الحمد لله".
وأكمل: "عايز أفهمكم أنتم خارج الموضوع نهائى ومش طرف في المعادلة خالص ولا إحنا أساسا في حرب مع حد لا المسئولين ولا معاكم يا أطيب شعب وأنا بترجاكم لا تسيئوا لأى أحد من أفراد الطاقم الطبى كم آلمنا ف اليومين السابقين كلامكم وتهجمكم على الأطباء واتهامهم بعدم الولاء وتخوينهم فنحن في أمس الحاجة لكل كلمة دعم ورفع للحالة المعنوية والنفسية التى هى بمثابة الوقود الذى يساعدنا على الاستمرار ويعطينا الأمل أن مانفعله ونبذله من جهد لن يذهب سدى، أما كلامكم السيئ بينهش ويدمر معنوياتنا لدرجة لا يمكن أن تتخيلوها، اطمنكم كلكم إننا معاكم للنهاية ومفيش حد هيقدر يوقع بينا واقولكم، لا ضميرنا ولا تعليمنا ولا تربيتنا هتسمحلنا بكده، اطمنوا كلنا في خدمتكم وتحت أمركم ولا يمكن نتخلى عنكم وإحنا أصلا عمرنا ماعملنا ده قبل كده ولا هنقدر نعمله، انتو أهلينا وإخواتنا وناسنا وحبايبنا انتو أحلى ناس وأحلى شعب وأطيب قلب".
واختتم هلال: "طلبنا ورجائنا منكم إنكم تخلوا بالكم من نفسكم وتحافظوا علينا وعلى أهاليكم وحبايبكم وتطبقوا الإجراءات الوقائية كما يجب وتحافظوا على التباعد الاجتماعي قدر الإمكان، وبكده هتحافظو علينا وتحموا أنفسكم وتحمونا".
