شارك الفنان أحمد مالك، جمهوره بما يجول بخاطره تجاه أزمة فيروس كورونا الذي يهاجم العالم.
وكتب "أحمد" عبر صفحته الرسمية على موقع التواصل الاجتماعي "فيس بوك": "كنت ناوي أكتب حاجة فيها هزار عن الفلوس والحالة المادية، بس لاحظت إني مش في أزمة قوية زي ناس فعلا حياتها ممكن تكون في خطر بسبب الوضع الحالي".
وتابع "مالك":"بعدين فكرت في الوضع الحالي، أنا حاسس إني معنديش حاجة أقولها أو أعملها، ومش قادر حتى أقول لنفسي أعمل إيه، حاسس إني تايه ومتلخبط بس حاسس إني مش لوحدي وده شعور غريب بشكل حلو، حاسس إني عايز أفضل ساكت وأتفرج، مش عايز أجري، مش عايز آخد كورس أونلاين، مش عايز أعمل أي تحدي، مش عارف عايز أو مفروض أعمل إيه انا بعترف إني مش فاهم حاجة".
واختتم أحمد مالك حديثه قائلا:" عارف إن كلامي ممكن يميل للضلمة بس حاسس إن دي مش مشكلة ومش مفروض تخوفني، حاسس إن دي مرحلة نادرة الإنسانية بتعدي بيها وكلنا جزء منها، العالم في حالة صمت، صمت له صوت أنا مستغرب ومستمتع بقوته، أنا معنديش حاجة مضطر أعملها أو أقولها غير إني أتأمل اللحظة دي وألاقي نفسي وسطيها، مش عارف لو العالم هيتغير أو لا بعد اللي بيحصل، بس أكيد هنفهم حاجة جديدة وحتى لو مفهمناش أكيد هنحس، أتمنى الخسارة تكون خفيفة علينا ومتحمس لليوم اللي هنحتفل فيه بمرور كل ده".
يذكر أن أحمد مالك يشارك في الفيلم الجديد "كيرة والجن" 1919 للنجمين أحمد عز وكريم عبد العزيز، المأخوذ عن رواية للكاتب أحمد مراد، ويجسد مالك أحد الأدوار المهمة خلال الأحداث بجانب كريم وعز، بينما يجسد بطلى العمل "كيرة والجن" بحسب الرواية، من إخراج مروان حامد.
