علق الإعلامي عمرو أديب على كلمة الرئيس عبدالفتاح السيسي خلال زيارته لكاتدرائية ميلاد المسيح، بالعاصمة الإدارية الجديدة لتهنئة الأخوة الأقباط بعيد الميلاد المجيد، قائلًا: "الرئيس السيسي في كلامه مقالش أن لو حد جه يقربلنا مش هندافع عن بلدنا، أو أن لو مصالحنا تم الاقتراب منها احنا ممكن نولع في الدنيا".
وقال "أديب" خلال تقديمه لبرنامجه "الحكاية" على فضائية "إم بي سي مصر" اليوم الاثنين: "الرئيس قال إن محدش هيجرجرنا هنا ولا هنا، وإن شاء الله ربنا يلهمنا الإجراء المناسب والسليم، ودا كلام الرئيس، وكلامه واضح أننا لن ننجر لمغامرات، أو فخ، ولكن لو كتب علينا القتال سواء حد قرب لمياهنا الإقليمية أو أرضنا أو حد يبعتلنا مرتزقة أو داعش من الحدود الغربية، مصر هتقف قدامه".
وأضاف: "عايزكم تفهموا الكلام زي ما هو، ومتفهموش أننا هنستكين" مؤكدًا: "الشرف مش معناه الضعف، وأشرف حروب في العالم قام بها شرفاء ضد ناس غير شريفة ونحن نقابل عدو غير شريف، برجماتي مستعد يلعب بأي حاجة ويقتل أي حد، وكلام الرئيس السيسي بيطمن المصريين، ورسالته أننا نقف جنب بعض".
