أكد الفنان أحمد مكي، في لقائه الأخير ببرنامج "معكم" للإعلامية منى الشاذلي، بأن ست كوم "تامر وشوقية" كان من إخراجه وهو من قام بتطويره ليخرج بهذا الشكل.
أثارت هذه التصريحات غضب مؤلف الست كوم عمرو سمير عاطف، الذي خرج لتوضيح الصورة عبر حسابه على موقع التواصل الاجتماعي "فيسبوك"، قائلًا: "الواحد ما بقاش فيه حيل يدخل فى جدال والموضوع ما بقاش فارق قوي وخصوصا أن "تامر وشوقية" كانت مرحلة عدى عليها سنين طويلة وانتهت".
واستكمل "الكلام اللى مكى قاله فى اللقاء عن "تامر وشوقية" العمل اللى كان بدايته الحقيقية والسبب اللى خلاه يبقي ممثل مش مخرج، كلام غير دقيق لأنه بيدى إيحاء أنه كان له دور فى تطوير الموضوع وكان سبب أن يبقي فيه حاجة اسمها ست كوم وأنه بيحب "يذاكر" الموضوع وبيقول "جبنا كتب" و"عملنا "وده كله كلام فيه مبالغة فى تصوير دوره".
وأكد عمرو: "لما ابتدى تصوير المسلسل مكى أخرج أول حلقتين وأنا وشريف عرفة -بصفته المنتج- والكتاب اتفرجنا عليهم وكان المستوي مش كويس ولو كان مكى استمر فى إخراج الحلقات ما اعتقدش إنها كانت ها تنجح، وقام شريف عرفة بوقف التصوير بعد الحلقتين لمدة أسبوع وقرر أنه سيخرج هو الحلقات ومكى ها يعمل دور هيثم وقد كان".
وتابع: "تامر وشوقية ما اتعملش لأن مكى كان عايز يعمل حاجة مختلفة، تامر وشوقية أنا فضلت سبع سنين ألف بيه على المنتجين والمخرجين لغاية ما شريف عرفه تحمس لانتاج العمل وشخصية هيثم مش من إبداع مكى لوحده أنا والكتاب اللى اشتغلوا فى العمل وشريف عرفة ساهمنا فى خروجها بالشكل ده".
واختتم "للأسف الواحد بيضطر يتكلم عن نفسه وعن مجهوده لما يلاقي تصرفات وكلام بيعكس نرجسية ورغبة فى التكويش على كل حاجة زى دة، بتمنى التوفيق لمكى دايما لكن لا أعتقد ولا أتمنى أن نتقابل ثانية لا فى عمل ولا حتى صدفة".
