حد يفهمنا معلش ثقافتي على أدى ومش فاهمة وعايزة حد يفهمني، وأكيد في ناس كتير ذي حالاتي مش فاهمين.. مش فاهمين إيه اللي بيحصل في بلدنا وعايزين حبايبنا من ذوى الخبرة والعقول النابغة والمسئولين اللي أصبحوا غير مؤسلين على اللي بيتقال بين الناس ومش فاهمينه.
حد يفهمنا هى الميه تروى العطشان؟ طبعا يا معلم.. طيب هى فين الميه؟ لا أنا قصدي هى فين الحكومة من (حرب الجراكن اللي وصل الواحد فيها لـ٥ جنيهات، (أصل المشرحة مش ناقصة قتلى) وفناطيس المياه وطلمبات المياه)، أين الحكومة من قطع الميه عن بعض محافظات القاهرة (الدقهلية اللي انقطعت من بداية رمضان لحين كتابة المقال)، والمنيا وقنا والشرقية وإمبابة وفيصل و٦ أكتوبر وبعض الأحياء (الغلابة يا حكومة)..؟ حد يفهمنا هى ميه دي ولا مش ميه؟ مياه الطلمبات والجراكن والفناطيس، طيب علشان تشوفوا دراما رمضانية واقعية تستاهل جائزة أوسكار لأنها حقيقية وأبطالها مواطنون غلابة بسطاء يعانون من غلاء الأسعار وراضيين وساكتين لقوا نفسهم فى عز الحر والشمس ضاربة رؤوسهم ومن الصيام دايخين وواقعين يبحثون عن الميه في الأماكن المجاورة، الجركن وصل ٥ جنيهات (بتقولوا كام يا ولاد)، ويلا يا جماعة قبل ما يعقل يا جدعان قبل (ما الميه تغلا يا جدعان)، المشهد فى عز الظهيرة، مواطنون يلجأون إلى الترع لغسل الأوانى والملابس، ويركبون عربات الكارو والحمير ليشترون جراكن المياه من الأماكن المجاورة (كارثة إنسانيه) خروج المواطنين من القرى ذي قرية الربع التابعة لمركز تمي الأمديد لقطع الطريق المؤدية إلى القرية وإشعال إطارات السيارات احتجاجا على نقص الميه، والقصة للمؤلف العبقري (الحكومة المصرية)، لإهمالها وعدم تحركها لمواجهة المشكلة وحلها والإخراج لمجهول، طبعا لتزامن انقطاع الميه في وقت واحد في أغلب محافظات مصر (شغل على كبير قوم إيه يا عمنا تلاقى تصريحات لبعض مسئولين بعد صمت طويل (نتيجة لأنهم صايمين) ومش قادرين يكلموا.. خود عندك (المهندس ممدوح رسلان رئيس الشركة القابضة لمياه الشرب والصرف الصحي) بيقول إيه؟ إن المياه انقطعت فى إمبابة نتيجة تغيير المحابس) طب هى حبكت تغييرها فى شهر رمضان؟ طب هى خسارة فيا يا راجل لا دى خسارة ليا، لأنها أكيد مش خسارة فى البلد بس خسارة للمواطن في الوقت ده عندك طول السنة اشمعنى دلوقتي والناس صايمة اديني عقلك، ويقولك علشان العشوائيات والبناء غلى خطوط المياه الرئيسية، يا سلام ده اكتشاف جديد ده (حد يفهمنا مين اللي إداهم تصريح بالبناء يا سادة؟ وأين الحكومة من تأخير استلام ثلاثة مشاريع لمياه الشرب في الدقهلية التي تكلفت ملايين الملايين ؟ واحد من هذه المشاريع بدأ في عام ٢٠٠٨ وهو (محطة مياه منية النصر) بتكلفة ٣٢٠ مليون جنيه، وبرر الدكتور مصطفى مدبولي وزير الإسكان أن تلك المشروعات تأخرت في تسليمها لأكثر من ١٠ سنوات لارتفاع سعر الدولار.. طيب مخلصتتش ليه يا فندم قبل مشكلة الدولار ما يرتفع؟ وأين حضرتك يا فندم من انقطاع المياه من بداية رمضان، ولا حياة لمن تنادى، وجاء وزير الإسكان في اليوم الرابع لتفقد الأعطال في المحطة بمنطقتي إمبابة والوراق، ثلاثة أيام من انقطاع المياه، حد يفهمنا أين رئيس الوزراء من مشكلة انقطاع الميه عن الناس؟ ليه مش حاسين بأوجاعهم دي مهزلة يا سادة، ليه مفيش حد طلع عمل مؤتمر صحفي يكلم الناس ويقول لهم المشكلة دي تتحل إزاي وأمتى ولا الحكومة مشغولة بمتابعة دراما رمضان ٢٠١٦، ودى ما كملت عندنا دراما واقعية كانوا ممكن يتبعونها ويتصورن فيها كمان مع إبطالها (اضحكوا خلوا الصورة تطلع حلوا) أين مجلس النواب؟ أهالينا مش لاقيين ميه نضيفة يشربوها، وفى أماكن لا تصل إليها فناطيس الميه (تحبوا نكلم جمعية رسالة أو الأرومان أو الجمعيات الخيرية، يا حضرات المسئولين علشان يتصدقوا على الشعب ويجيبولهم ميه نضيفة (رمضان كريم) دي كارثة إنسانية يا مسئولين، ولا أنتم مشغولون بقمر الدين والقطايف؟ وسأكرر ما قلته مرارا وتكرارا وقد ذكرته في المقالة الأخيرة لي عن حوار الريس مع أسامة كمال أن هناك أسئلة لم يجاوب عنها الريس بعمق وهى أولويات المشاريع القومية ومنها العاصمة الإدارية، حد يفهمنا؟ ولتكرار كلامي هناك إنجازات قام بيها الريس والقوات المسلحة تعتبر إعجازا في فترة قصيرة ولكن عاصمة إيه التي سوف تتكلف مليارات ونحن بحاجة إلى هذه المليارات لإعادة صيانة العاصمة القديمة والبنية التحتية، ومنها إعادة صيانة شبكات المياه المتهالكة والصرف الصحي) ودى أبسط حقوق الناس والمواطنين حياة كريمة يشربون مياها نضيفة بعيدا عن الأوبئة والأمراض وذي (أرضنا العطشانة التي تعانى من العطش في بعض المحافظات ولم يجد الفلاحون المياه لري أراضيهم لأكثر من ٢١ يومًا، وهذا سؤال تأني حد يفهمنا ماذا سيحدث بعد سد النهضة يا سيادة الريس، ماذا نحن فاعلون فى السنين القادمة؟ سيادة الرئيس نحن نعلم أن (التركة تقيلة وصعبة)، ولكن إحنا محتاجين إعادة لأولويات المرحلة القادمة، ومحتاجين مسئولين على قدر من المسئولية والشجاعة.. ابعتولي لو في حد عايز يفهم حاجة وإحنا معاه لأن أكيد في حاجات كتير محتاجين لحد يفهمها لنا.
للتواصل: Hend.farahat12@gamil.com
