الدكان قفل ، رصيد الدعم الشعبي نفذ ، زمن العواطف والقلوب الطيبة ومصمصة الشافيف « بح» و معلش يا حكومة وجماعة وغلط ما عدش يجي من ده أبدا ، كلام نهائي : «لا مصالحة مع جماعة المنكر والدم »، رئيس حكومة بلدنا محلب بيه عداه العيب ، شرب ع الصبح كوزين تمر هندي ساقعين في عمان وادها تصريح وش : « مفيش سلام ولا كلام مع الإخوان » هو كده ، هنشرح ليه وعلشان إيه ، مش هنشرح ولا هنبرر ، أقولكوا بصوا شوية على بيحصل وشوفوا واحكوموا واسألوا : « ينفع نقول صلح !» ، ده كلام ، دم هنا ودم هناك ، وتخريب جوه وتخريب بره ، وعاوزين ريق حلو يا أخى دهده ، أحسنلكو ، اقفلوا الصفحة دي ، وبصوا ع الصفحة اللي وراها ولا تعليق علي أحكام القضاء بإعدام اللئام ، واللي ف بطني طلعته ، اقفل يا بني الدكان ، خلص الكلام .
