وهي نظرية كنت استخرجتها من كام سنة بتقول: "إن ما فيش مهندس ديكور في المسلسلات المصرية يقدر يشتغل من غير الأباجورة".
الأباجورة هي البصمة الواحدة إللي بتجمع تخيلات، وتصورات كل مصممين الديكور.. حتى أنا مش هستغرب لو اكتشفت أن قسم الديكور في معهد السينما فيه شعبة أباجورات..
والأباجورة لازم تكون موجودة في أي بيت مهما كان مستواه المادي أو الاجتماعي.. ولازم تكون منورة مهما كان مستوى أو شكل إضاءة المشهد..
الأباجورة عاملة زي ما تكون سر، أو رمز، أو شفرة مخفية يمكن ما نكتشفهوش دلوقتي.. بس أنا مش هرتاح غير لما النظرية تكمل وأعرف السر.
