الأكادة يا أخواننا، ومع احترامي لكل المعجبين والمنبهرين والمندهشين بهذه التوليفة التي تشبه الاستروكس، أنا بقى لي 52 سنة على وش هذا الكوكب ومتربي في اكتر منطقة شعبية فيكي يا معمورة، حي شبرا العتيق، وفي أغلبها وأشعبها حارة مصرية، ورشة سمعان ولي الشرف، ولا عمري شفت حاجة من اللي بتيجي في "توبة" ولا قبله "ملوك البلطجة"، عذرا الجدعنة،. يعني حد يقول ان العلاقات تبقى مباحة ومفتوحة ومفضوحة كده زي اللي بين "سيد الأجنبي" و"فايزة"، ولا ييجي "عتريس" يتجوز "لؤة"، معلش قصدي ماجد المصري اللي بذل مجهود خرافي علشان يثبت لنا أنه "صاااايع طحن".. ولا كله كوم و"عبده موتة 2"، قصدي عمرو سعد "العالمي"، اللي استعار كل قاموس الصياعة الشياعة والنوم عالأرصفة علشان يوصلنا لمرحلة الخوف منه ولا السيجارة اللي ملازماه طول الوقت وهو أصلا مش بيدخن ولا ياخد النيكوتين على مراوح صدره ولا بيطلع من نخاشيشه.. والمسلسل كوبي بيست أصلًا من فيلم المشبوه.
ومين في ايوتها حتة شعبية فيكي يا جمهورية شاف منظر ابن الحتة وهو بيتعمل فيه اللي اتعمل في توبة ولا حد بيحوش ولا بيحجز ولا دمه بيحمى، هو ايه يا أخي احنا خرفان بصوت القدير سيد رجب في رائعة تتح،
إلا صحيح.. هل فعلا ممكن يتوجد خال نذل زي طرزان، محمد لطفي، ولا أخ غدار بالشكل ده زي ابراهيم، دياب، ولا ابن عم "نوري"، بالوطينة دي يتآمر على عمه و"يقرن" على بنت عمه، ويشهد على عقد اغتصاب "زوجة توبة".. ولا أبو لؤة اللي تتحط المطوة على رقبته فـ "يخر" مستسلما ومسلما لبنته ولا المأذووون المغلوووب على أمره اللي عايز يخلص علشان يكفي على الخبر ماجور.. بجد احنا لو اعدائنا هيدفعوا ملايين علشان يشوهو سمعتنا مش هيعملوا اكتر من كده.
والسؤال الأخير بأه.. يعني هو مفيش غير مصر اللي بيحصل فيها مصايب ونسمح للي جاي واللي راح وبوحة الصباح انه ينتج مسلسلين في سنتين ورا بعض يطلعونا عالم ولا مؤاخذة بالشكل ده.. فياترى يا هل ترى السنة الجاية هيعرضوا ايه تاني يشوه صورتنا.. وماحدش يقول لي ده اسمه فن واقعي.. يعني لو في دولة جارة لينا فيها كذا ولا كذا هنشوف ده في افلامهم ومسلسلاتهم.. ولا يعني هي كل مرة تيجي على مصر بس ؟
