لغز أول.. فُرقة دايمة
مشهد البعد الآخير
وأنتِ بتقولى النهاية
وابتسمتيلى بضمير
ألف معنى لابتسامتك
كلهم مافيهموش خير!
لغز تاني.. فَخ جِسمك
لما انا اتعلمت رَسِمك
كل حاجة ناقصة حِسّك
وأنتِ ساكنة فـ الأصول
فَخ تاني..
لما قولتي.. يلا قول!
لغز تالت.. لما جالك
قلبى خاشع وانحنالك
وأما حان وقت الصلاه
صوت أدانى مجاش ودانك
روحتى ليه اتوضيتى طيب
لما أصلًا.. مش ف بالك!
لغز رابع.. اعتراف
حد آمِن.. حد خاف
حد ساب نفسه بزيادة
وحد حب الاعتكاف
كل واحد خد كفايته
مـ الشغف والاكتشاف!
لغز خامس.. كله سرّ
ليه سمحتى ليا أمُر
ثم ليه وبدون مبرر
قولتى لى للخلف دُرّ!
كنتى خبيتى جمالك
لما طعم الحلو.. مُرّ
لغز سادس.. فَصل قصة
انتهى بأن أنتى حاسة
واما جيت انطقها هَمسة
قولتى لسه.. فصل قصة!
شيء غريب أن اللى حَفّظ
هو أول حد ينسى!
لغز سابع.. «سلسلة»
كل حلقة بمشكلة
قِفلها مقطوع لسانه
والحكاوى متلتلةِ
كل ديه.. ألغاز فى حُبِك
غير طوفان الأسئلة!
