يعانى وليد محمد السيد، ١٤ عاما، من أبناء محافظة المنيا مركز مغاغة، منذ ولادته من عدم القدرة على الحركة، وسعى والده لإيجاد وسيلة تساعده على المشى حتى يستطيع الذهاب إلى المدرسة.
ويقول محمد السيد: «اشتريت له عكاز علشان يقدر يروح مدرسته زى الطلبة إللى فى سنه، وإحنا ناس على قد حالنا، أنا راجل شغال فى الفلاحة، يعنى أرزقى يوم فيه ويوم مفيش».
وتابع: «روحت بيه كذا مستشفى حكومى، وكانوا معظمهم بيقولولى مفيش علاج لابنك، والحل هو بتر قدمه، وبعدها روحت بيه مستشفى خاص، والدكتور قاللى ابنك محتاج عملية ترقيع القدم، وعملية للنخاع الشوكى وتكلفتها ١٠ آلاف جنيه، وعندى ٦ أولاد غيره، هصرف عليهم إزاى وأعالجه منين، دخت بيه، وحالته بتسوء كل يوم».
وأضاف: «نزلت بيه القاهرة، ورحت مستشفى أبوالريش، لقيت الوضع هناك لا يحتمل، ومعندهمش الإمكانيات لعمل العملية ولازم تتعمل فى مستشفى خاص، ولو معملش العملية هيتم بتر رجله، وإحنا على قد حالنا وظروفنا صعبة، وأتمنى من وزير الصحة والمسئولين مساعدتنا فى علاج ابنى».
