بعترف..
إن المسافة بتنصف الأشخاص فى مقدارها
وإن الغياب أمثل طريقة لكشف أو إثبات حقيقة
وإن الحقيقة..
«فى حاجات كتير ساعة تسافر هتخسرها»، وخسارة أبدية
فيّا أى حاجة فى دنيتى ديّا
معاليكى عادى وممكن أستغنى
واللهُ أغنى عن عيون معاليكى
بعترف..
إن البشر كل البشر واحد
وإن الكلام دا للبشر مش ليكى!
عاملة إيه؟
أنا لسه هكتبلك بحبك دمَّعت عيني
وحشتيني....
إنتى الوحيدة فى غربتى معايا
رغم المسافة والغياب فيَّا
يارب دى ضحكتى وعايشة جوايا
شرط إنى أعيش وابتسم تبتسم هيا
هيا الوحيدة الحلوة فى عنيا
بنتى وحبيبتى وكل شيء ليا
أنا أها مسافر والسفر طوّل
بس إنتى عايشة فى روحى سكنانى
وحشانى مكرونتك
بحبك..
وحشانى تكشيرتك وأصالحك تضحكي
متبطليش تضحكى
أنا لمَّا بلمح ضحكتك بالاقينى بضحك لوحدي
سبحانه رابط قلبى بعنيكى وملامحك
إن يوم ضحكتى ألاقينى بضحك
إن بكيتى ابتسم علشان أشوف ضحكتك
وأقعد لوحدى أفتكر، وأبكى لوحدي...
والله بدعيلك..
وقبلي..
ويومياتى بناديلك
فى قلبى
يا تجينى يا أنا أجيلك
ونسهر..
تحكيلى وأحكيلك
فهزر..
تضايقى أزودها
تغني..
تضايقنى أغانيكي
تحنِّي..
تقوليلى طب نسكت
أضايقك..
ألاقيكى فى عنيا
فَ أحبك
وحشتنى تفاصيلك وكلك..
الشمس بتحرر لأنك
من الجنة مش من الأرض
بحبك بس مش كلمة وهعيدهالك وتبتسمى
بحبك فرض..
وشايفك كل شيء فى الأرض
كإن الورد متحاوط بطيف روحك
أو إنتى فى روحك الحلوة جناين ورد
وحشنى النيل ومشاويرنا وسهرنا
لقانا وغنانا وكل شيء منك
بس إنتى الوحيدة اللى لو وحشتنى بتألم
شكرًا لأنك كل يوم بتجينى أشوفك ونتكلم
شكرًا يا بنتي..
بالله عليكى متغبيش
تعاليلى نتخانق ونتصالح وأحبك
العمر إيه غير خناقنا وضحكتك وإنتى
الجنة إيه بعد السفر غير طلتك ليا
ومشاعرى إيه طول السفر غير طلتى فى عينك
لحظتها بس هيقرأ قلبك كل شيء فيا
وهتقرأ عينك فيا تدوينك
لو كنتى عايشة بتضحكى بيا
فأنا روحى مش موجودة من دونك
«بحبك لسه حالًا طالعة من عيني»
