بيشة على الوجه الجميل
ملاية ع لخصر النحيل
وف رجل صابر ع الشقا قبقاب
تطفي لهيب الشقا رنة الخلخال
منديل محلاّوي يمسح عرق الجبين
وتسمع الموّال
على نغمة خارجة
من بين شقوق بيوت
عرق الشقا مكحّلها
والكحلة خط اسود بين الرموش
يظهر محاسنها
وإسورة فالصو على الإيد تزيّنها
والإيد على إيد الطلبمة
تدوّرها وتملا حلّتها
للشرب والاّ للحُما
كاتك حمّى تاخدك يا ابو لسان عايب
ويضحك الشايب
الضحكة ليها رنّة تهزّ جدران
البيوت في الحارة
الله يجازيكي بالخير يا نوّارة
الكعب من حكّ الحجر
أحمر بلون الورد
ووردتين موهوجين من قرصتي للخدّ
ماشية تهدّي الخطاوي
وتتعايق بالقدّ
وقدّ إيه صابر على اللقا ملهوف
ما يبعدوش عنها
غير الخشا والحيا والخوف
لفح الهوى توبها
هفهف على عودها
صابر لأنه رايدها
زقّ الهوى بصدره
ابعد بقى عنها
دي العفّة عنوانها
وليه تعرّيها
للخلق وعيونها ؟
لملم نسيمك من جوّه الصدور وامشي
وتوبها لو طاوعك
حلال عليك التوب
واغطّيها انا برمشي
