هنيدي يدعم محمد صلاح بعد خسارة ليفربول من ريال مدريد
حرص الفنان محمد هنيدي على دعم اللاعب محمد صلاح عقب خسارة فريق ليفربول من ريال مدريد في نهائي بطولة دوري أبطال أوروبا.
ونشر هنيدي صورة لصلاح عبر صفحته بموقع التواصل الاجتماعي فيس بوك، وعلق عليها قائلا: "عارف لما بتبقى بتلعب بلاعب في البلاي ستشين وفجأة تلاقيك بتنافسه أو اللاعب بعد ما اعتزل بيحلل أداءك في التلفزيون وبيوصفك بالأفضل في منطقتك في العالم".
وأضاف قائلا: "عشان كدة بقى عايز أقول حاجة ... بقالي فترة بشوف "بعض" الشباب اللي بيحاول يسخر أو يقلل من صلاح ... يمكن يكونوا مابيحبوش صلاح أو بيشجعوا فرق منافسه ...من حقك ماتحبش صلاح وحقك تحب فريق منافس وتشجعه .. بس الفكرة ليه تقلل او تكره واحد قدر يعمل اللي ملايين كانوا بيشوفوه مستحيل؟ .. صلاح اللي كان بيسافر بالقطار كل يوم وينام في النادي ع الأرض وبدون واسطة قدر يصنع نفسه من الصفر ... لغاية لما وصل انه بقى ينافس على الأفضل في العالم ... صلاح زينا وشبهنا .. ماتولدش في بقه معلقه دهب .. قدر يكون مثال لأي واحد بيتعب وشايف انه حلمه وهدفه مستحيل يتحقق ... صلاح مثال لأي شخص مجتهد وبيمر بظروف صعبة وحياة صعبة ... مثال انك تقدر مش بس تكون الأفضل في بلدك ... تكون الأفضل في العالم ..".
وتابع قائلا : "الفكرة مش في الشخص .. الفكرة في الفكرة نفسها ... ان يكون عندنا شخص واشخاص طبعا في مجالات كتير تانيه زيه... قدروا يحققوا اللي انت واحنا كنا شايفينه مستحيل .. فالحب والقدير لصلاح.. مش حب لشخص ..حب لفكرة ونجاح وهاردلك لصلاح".