"هلهلي".. صدمتي كانت عنيفة لما سمعت كلمات أغنية حميد الشاعري

حقيقي وبلا أدنى مبالغة.. ماكنتش مصدق وداني وأنا باسمع كلمات هذه الأغنية.. صدمتي كانت عنيفة في المطرب حميد الشاعري الرائع اللي سمعت له: “باجي لك من ورا الأحزان ولسه فاكر العنوان، وماكانش ليكي إلا أنا، وغيرها من الأغاني التحفة”، هل طبيعي يوصل بينا الحال لأغنية بعنوان "هلهلي".. طيب خلينا إيه لبتوع التوكتوك وأغاني المراجيح.

تقول الأغنية وهي من كلمات وألحان عزيز الشافعي:

هلهلي. كنت عايش هلهلي. عمري دة مش فارقلي
اي حاجة في اي حاجة. واللي جاي مش باينلي

جيتي انتي. يا حياة قلبي انتي. نو عينيا حبيبتي
فجاة غيرتي كل حاجة. لما حبك ندهلي

يا وردة. عاملة ايه النهاردة
كل يوم انتي احلى. والحياة بيكي تحلى

يا فلة غيري مين بيكي اولى
حاولوا مليون محاولة. عنك انتي ما اتخلى

يا حلوة. سلميلي ع الحلاوة
والدلع والشقاوة. دة انتي غالية غلاوة

امانة. سلميلي على خد وردي
يسوى كل الدنيا عندي. وانتي جنبي محدش قدي

بالمناسبة أنا أكبر عاشق للفن الشعبي وأكبر مروج للغة العامية اللي شايف انها لغة الحياة والمعايشة لكن مش لدرجة اننا نوصل لمرحلة "هلهلي" يعني.. صحيح ممكن يكون السوق نايم والإحساس بقي معدوم، بس احنا مش لازم نزود الطين بلة.