أحمد العوضي: أي تصريح عن حالة ياسمين عبد العزيز من خلالي فقط
علق الفنان أحمد العوضي على الحالة الصحية لزوجته الفنانة ياسمين عبد العزيز .
وقال "أحمد" عبر موقع التواصل الاجتماعي "فيس بوك": "يا جماعة بعد إذنكم.. أي تصريح عن الحاله عن طريقي فقط.. وأنا مقلتش أي تصريح عن حالة ياسمين غير إني طلبت منكم دعواتكم.. وتمنياتكم لها بالشفاء العاجل هي في الرعايه دلوقتي ومحتاجه دعواتكم.. دي كفايه انها تهون عليها".
وفي وقت سابق قال أحمد العوضي عبر "فيس بوك": "يمكن ببان قدامكم دايما قوي.. لكن الحقيقه انا دلوقتي أضعف إنسان على وجه الأرض عشان أنا روحي مش معايا، أنا ضعيف جدا من غيرك أنتي لازم تبقي كويسه ولازم تقومي بالسلامة".
وتابع "أحمد": "أنا لأول مره أكتب من غير ما اكون مفكر أنا بكتب إيه وهكتب إيه، بس أنتي هتقومي أن شاء الله بإذن الله عشان انتي وعداني وعد وهتتفذيه، أنا عاوزك تبقي كويسه وتقومي عشان اقولك اني لو كنت ببينلك إني بحبك مرة فالحقيقي واللي جوايا إني بحبك ألف مرة، وأنا دلوقتي مش قوي زي ما انتي بتشوفيني أنا دلوقتي ضعيف ضعيف جدا، لحد ما تقوميلي تاني عشان زي ما أنتي بتاخدي قوتك مني أنا كمان باخد قوتي منك".
واختتم "العوضي" حديثه: "قومي عشان أنا بحبك، بحبك أكتر بكتيير من كل الكلام اللي أنا كتبته.. أكتر بكتير من كل اللي عدينا بيه مع بعض من أيام حلوة ومواقف صعبة مرت علينا، أكتر بكتير حتى من الموقف اللي إحنا فيه دلوقتي، أنا بحبك، ادعولها تقوم بالسلامة زي ما أنتوا دايما بتدعولها بالنجاح والتوفيق هي دلوقتي محتاجه دعواتكم".
من جانبه قال الفنان وائل عبد العزيز شقيق ياسمين عبر حسابه على "فيس بوك": "صباح الخير أنا كل اللي هقدر أقوله دلوقتي ادعوا لياسمين حالتها خطرة".
وطلب عدد من نجوم الفن عن حساباتهم على مواقع التواصل الاجتماعي الدعاء لياسمين عبد العزيز.
