نزلة برد منعت خروج آخر أعمال «المنتصر بالله» إلى النور
كشف السيناريست وليد يوسف عن آخر عمل مسرحي للفنان المنتصر بالله، قبل وفاته الذي لم يكتمل بسبب دور برد أصاب الفنان الراحل، حيث نشر صورة من إحدى البروفات داخل شقة الفنان الراحل وعلق عليها قائلا: "الصورة دي في البيت عند مونتي كنت بعرفه على جزء من فريق عمل مسرحية أطفال كانت بطولته وكان ها يرجع بيها مرة تانية للشغل.. في بروفات الترابيزة كان متألق كالعادة.. وكان بيرمي إيفيهات مضحكة جدا وغير متوقعة".
وأضاف: "عملنا ٣ بروفات.. وكلمتني رانيا بنته طايرة من الفرح الدكتور اللي بيتابع عنده مونتي قال لها إن الشغل عمل طفرة في حالته وإن الجلطة اللي كانت مقعداه في البيت لسنين في طريقها للشفا وتحمسنا أكتر للمشروع ومش عايز أقولكم فرحة كل الممثلين اللي في العرض وإحساسهم بالفخر للشغل معاه".
وتابع يوسف: لكن للأسف مونتي جاله دور برد.. تعب شوية وأجلنا البروفات.. وزاد التعب ورجع مونتي للبيت تاني.. وفضل تعبان لحد ما راح لربنا النهارده.. فيه ناس كتير روحها وحياتها في الشغل.. مابتحسش إنها عايشة وموجودة غير بالشغل.. قعدة البيت موت مبكر لكن مونتي هيفضل موجود وعايش ومبهج".
وأنهى حديثه قائلا: "أنا متأكد إنه دلوقتي بينشر البهجة في السما زي ما كان بينشرها في الأرض.. خالص عزائي ليكي يا عزيزة يا ست الستات.. نموذج الزوجة الوفية.. وربنا يصبر قلوبكم يا بنات".