"أمهات مصر": 97% من أولياء الأمور غير راضين عن مستوى الأنشطة في المدارس
أجري اتحاد أمهات مصر للنهوض بالتعليم، برئاسة عبير أحمد، استطلاع رأي حول مدى رضا أولياء أمور طلاب المراحل التعليمية المختلفة فيما يتعلق بالأنشطة الطلابية داخل المدارس.
وأضافت عبير، في تصريحات صحفية اليوم، أن الاستطلاع شارك فيه 572 ولي أمر بمختلف المدارس على مستوى الجمهورية، وأسفرت النتيجة عن وجود 555 ولي أمر غير راضين على مستوى الأنشطة بالمدارس أي بنسبة 97%، بينما أبدي 17 ولي أمر أي بنسبة 3% ترحيبهم ورضاهم عن مستوى الأنشطة.
وشددت عبير، على أهمية ممارسة الطلاب في جميع المراحل التعليمية للأنشطة الطلابية المختلفة سواء الرياضية والثقافية والفنية والعلمية والاجتماعية لما تمثل أهمية كبيرة في حياتهم وتعمل على بناء جيل واعي وقادر ومميز وسوي في المستقبل، مطالبة وزارة التربية والتعليم بالتركيز عليها داخل جميع المدارس وحل جميع المشكلات التي تعوق تنفيذها.
وكان المئات من أولياء الأمور تفاعلوا على صفحة اتحاد أمهات مصر للنهوض بالتعليم، في فيس بوك، حيث قالت: "حاجه تحزن.. الأنشطة بقت ذكريات للأسف، فين أنشطة زمان؟، الرسم والموسيقي والزراعة والتريكو وفن الطبخ والخياطة والصيانه والألعاب الرياضية والمسابقات بين المدارس!! وحصة المكتبه الرائعه.. أنشطة اليوم أنشطة عقيمة ومالهاش لازمه.. قال نشاط فني قال!، وياريت الطفل هو اللي بيعمله عشان يستمتع حتى ويبقي عنده خبرة استخدام الأدوات زي المقص أو اللاصق، دي الميس هي اللي بتعمله للولاد والأطفال متفرجين فقط كمان".
وأضافت ولي أمر أخري: "مفيش أنشطة، إذا كان في عجز في مدرسين المواد الأساسية هيبقي فيه مدرسين أنشطة؟"، وتابعت أخري: "مفيش أنشطة أساسا وأقصى حاجه ييجوا طلبة التربية العملى بيلعبوا الأولاد حصة ألعاب وبس".
واستكملت ولي أمر: "حصص المكتبة والموسيقي بتتاخد للمواد التانيه، الحصة اللي الأطفال بيستنوها"، وقالت أخري: "الولاد عندنا ميعرفوش يعنى ايه نشاط مدرسي ولا بياخدوا حصة ألعاب ورسم، تفتكرو هينمو مواهبهم ازاى؟، وبيقولوا مفيش مدرسين".
وذكرت أخرى: "للأسف مش كل المدارس مهتمه بالأنشطة ولكن اللي عرفته إن الأنشطة محتاجة ميزانية وامكانيات بعض المدارس لا تسمح أو لا توجد ميزانية، طبعا دي أمور انا كمدرسة ما عنديش فكرة عن المسئول عن تمويل الأنشطة المدرسية وما يهمنيش أسال ولكن اللي عندي في مدرستي وهي مدرسة إعدادي بنين الفترة الوحيدة المتوفرة من الأنشطة هي الألعاب، الأولاد عندهم طاقة لا بد من استغلالها وهم عندهم استعداد فعلا، مثلا عندنا مقاعد كتير متكسرة والأولاد عندهم حصة مجالات فسألت ليه ما يستغلوش الخشب ده في حصة المجالات بدل ما الأولاد يقعدوا في الحصة كدا من غير ما يعملوا حاجة، قالوا الخشب دا يعتبر عهدة هنتحاسب عليها، يعني من الآخر يتركن خشب كدا في مكان في المدرسة ولا يمدوا ايديهم عليه".