ليه هنتخب السيسي "2"
الأسبوع اللى فات حضرتك كنت شايف إن مفيش أى إنجاز قام به الرئيس.. بس ما تيجى كدا أسألك هو يعنى إيه إنجازات؟ مفهومها إيه ويا ترى تبقى عاملة إزاى بعد أكثر من ٢٠ سنة فساد مستمر ومنظم وثورتين وحكم إخوان؟! الإنجاز لغويا هو ما يتم تحقيقه بنجاح بعد تخطى العقبات، ولكى تطلق على عمل ما إنجازًا فيجب أن يكون المكلف به قد قام بالفعل من الانتهاء منه وأنجزه، ويطلق أيضا على الأعمال الضخمة كإنجاز زراعى مثل إنجازًا تعليميًا أو إنجازًا صناعيًا. «المعنى اللغوى والعلمى لكلمة إنجاز».
أما من وجهة نظر المواطن البسيط فالإنجاز يعنى أن يصبح كيلو السكر بـ٦ جنيهات وكيلو اللحمة بـ٤٠ ج.. والحد الأدنى للأجور يصبح ٣٠٠٠ ج يعنى كل اللى هيربطنا بالبلد دى هناكل بكام؟
هو انت دلوقتى مش لاقى تاكل يعنى؟
ولا مستورة الحمد لله؟
عارفة إنها مستورة.. بس صعبة وصعبة أوى.
وده مبدأ احيينى النهاردة وموتنى بكرا علشان كدا بيجى بكرا ومبنلقيش بكرا. طب ممكن أعرف ليه حضرتك لما بتسافر برا مصر بتقبل تشتغل أى شغل وتجوع يومين وتلاتة وتنام على الرصيف؟!
وليه بتقبل فى الغربة بحالة التقشف وتبخل على نفسك بكل حاجة وبتبقى حجتك فى كده إن بكرة يبقى أفضل، وإنك بتبنى مستقبل ليك ولأولادك؟
طب يا سيدى ما تطبق المنطق ده فى بلدك على الأقل أهى بلدك.
هتقولى إنتى مش حاسة بالناس، وشكلك كده من أصحاب النخب اللى بيطلعوا يكتبولنا كلمتين ولا هما حاسين بحاجة.
لا أنا بشتغل وأنا عندى ١٦ سنة، اشتغلت كل حاجة لحد ما بقيت محامية محترمة.. لأن الشغل مش عيب والشقى مش مهين، وإنى أتخرج وأفضل قاعدة مستنية شغل بـ٥٠٠٠ ج وأعمل فيها هانم فى ظل الظروف اللى بتمر بيها البلد ده اسمه عته وقنعرة كدابة، ما هو أصله مش منطقى إن كلنا عاوزين نبقى بهوات، زمن البهوية انتهى، والعالم كله بيعانى من أزمة اقتصادية، نظرا لازدياد أعداد البشر مقابل قلة الموارد، يعنى بالبلدى كده كلنا رايحين فى داهية. فمطلوب من سعادتك تقوم من النوم بدرى وتشقى وتشتغل بجهد وإخلاص وتفانى علشان تعرف تعيش، ده حتى الرزق فى البواكير يا أخى، لكن الشعب ده بيبدأ يومه الساعة ١٢ الظهر على ما يفطر ويظبط دماغه بكوباية شاى هوووب اليوم خلص، فلو اشتغل ساعتين على بعض بتجيله حالة إعياء.
تقدر تقوله إمتى آخر مرة رفضت فيها تاخد رشوة أو رفضت تدفع رشوة؟
تقدر تقولى إمتى بطلت ترمى زبالتك فى الشارع؟
تقدر تقولى إمتى عملت ثورة كده فى بيتك وقمت بعملية ترشيد استهلاك للكهرباء والمياه؟
تقدر تقولى إمتى فكرت فى مبدأ الجماعة مش الأنا؟
مشكلتنا إننا عاوزين إنجازات وقتية، إحنا الشعب بتاع لحظتها، عمرك فكرت كمان عشر سنين مصر دى هتبقى عاملة إزاى ابنك هيتخرج ويشتغل فين وبكام؟ ولا إنت عاوز تأكله النهاردة وتجوعه بكرة ويكمل حياته بيدعى عليك لأنك أنجبته فى بلد مفيهاش مستقبل...؟ فى فساد؟ آه فى فساد بس ده فساد متربى على إيدينا، وعلشان نموته لازم كلنا نعمل كده مش رئيس بقاله تلات سنين فى دولة بقالها سنين غرقانة فى فساد.
واحنا عاوزينه يحولها لسويسرا فى تلات سنين، ده إنسان زيى وذيّك مش إله، ده ربنا سبحانه وتعالى خلق الكون فى ست أيام يا راجل يا طيب.
لعل السمة الغالبة على مشروعات الرئيس عبد الفتاح السيسى منذ توليه هذا المنصب المخيف بعد هذا الكم الهائل من الأحداث التى كانت كفيلة بانهيار هذا البلد هى المشروعات القومية الراسخة القوية، ووضع بذرة تنمية، علينا جميعا العمل على زرعها والإصرار والصبر على طرحها وحصادها.
تحيا مصر وسنحيا معها بالعمل والإخلاص واتقاء الله فى نعمته علينا.