علق المجند أيمن قنديل المجند الذي قابل الرئيس عبدالفتاح السيسي بالعلمين على تسلمه هدية الرئيس، وهي عقد ملكية مكتبة جديدة قائلاً : "كنت متأكد بنسبة مليون في المية أن الرئيس سيحقق لي مطلبي بالطبع".
وحول مشاعره عندما قاد العجلة بجوار الرئيس السيسي، تابع في مداخلة هاتفية خلال برنامج " كلمة أخيرة " الذي تقدمه الإعلامية لميس الحديدي على شاشة " ON" قائلاً : "لو قعدت من هنا للسنة الجاية مش هعرف أوصف مشاعري أني سقت العجلة بجوار الرئيس السيسي".
أكمل : "في بداية اللقاء إتخضيت ومكنتش حاسس بنفسي لما الرئيس قلي سلام عليكم الكرسي بتاع العجلة بتاعك واطي ليه كده ؟ فعليناه وقلي تعالى هات عجلتك وسابقني وسألني عن إسمي قلتله " أيمن" وقلي سابقني ولما تكلم معايا قلي أنت مكسوف مني ؟ أنا زي والدك ثلاث مرات فهديت وأخدت نفس وبدأت اتكلم معاه ببساطة ".
واصل : " الخضة في الاول ده طبيعي لأني بأقابل رئيس الجمهورية وماكنتش أحلم بحاجة زي دي.. ولما قلي نفسك في إيه ؟ فضلت للحظات مش عارف أقول ايه لحد ماحكتله عن مشروعي الصغير وإزاي نفسي أكبره وسألني هل في مكان معين كويس ؟ قلتله فيه مكان كويس وشغال .. والحمد لله ".
أتم : " أول تليفون عملته بعد لقاء الرئيس كلمت والدي وحكتله ومكنتش عارف أقوله إيه ؟ مكنش هيصدقني بس انا كلمته في نص الليل وده وقت متأخر عندنا في منطقة العامرية في الاسكندرية وسألني فيه حاجة يعني ؟ قلتله لا تمام الرئيس أتكلم معايا وسألني محتاج حاجة ؟ وقلتله الرئيس بيسلم عليك وفعلاً الرئيس بعتله السلام.
