وجهت الفنانة نشوى مصطفى رسالة للشعب المصري بعد شفائها من فيروس كورونا، قائلة: "أبوس إيديكم لو بتحبوا ربنا، وبتحبوا ولادكم، اتقوا شر الألم اللي أنا حسيت بيه، حافظوا على نفسكم علشان ولادكم وأكل عيشكم، كلنا على باب الله".
واستطردت في مداخلة هاتفية مداخلة هاتفية عبر برنامج "كلمة أخيرة " الذي تقدمه الإعلامية لميس الحديدي على شاشة "ON" قائلة: "كلنا على باب الله وماشيين بالأرزاق، عشان أكل عيش ولادكم مش هينفع لو أنت عامل أو صنايعي ترقد.. حافظ على نفسك أرجوك بالكمامة.. كمامة تمنها 3 جنيه هيحافظوا عليكوا هيخلوك لبيتك وأولادك".
وتابعت: "أنا كان معايا فلوس بس مفيش مستشفى كانت عاوزه تقبلني من المستشفيات الخاصة لكن مستشفى بلدي العامة الحكومية قبلتني، أنا عندي فلوس وربنا ساترني بس مكنتش بقدر أحط في بقي لقمة.. الفلوس مش مهمة لما تبقى معاكي ومفيش مستشفى راضية تقبلك أو قادرة تاكلي حتى.. الصحة يا جماعة أهم من أي حاجة في الدنيا.. والنبي ما تستهونوا.. كورونا دي صعبة جدًا أصعب من ألم الولادة.. فيه ناس ربنا بينعم عليهم وتبقى خفيفة بس أنت هتضمن منين أنها هتجيلك خفيفة". وأتمت: "أنا أهملت واتكسفت من لبس الكمامة وما تسلموش على حد بإيديكم، وحافظوا على التهوية والتباعد والتغذية، كلوا برتقانة، وحزمة جرجير أو جوافة وحتة جبنة قريش، دي نصايح الدكتور، حافظوا عليها عندنا الحاجات دي وخيصة احموا نفسكم مع الكمامة".
واختتمت مداخلتها موجهة الشكر لمبادرة 100 مليون صحة التي أطلقت قبل عامين قائلة: "لازم أشكر مبادرة بدأت من سنتين والرئيس قال وقتها: لازم 100 مليون مصري ينزلوا يكشفوا وهي مبادرة 100 مليون صحة ببلاش لفيروس سي وسكر، وبالصدفة أمي وقتها اكتشفنا إن عندها فيروس "كورونا"، وأمي دي نور عنينا العلاج كان بره ومكلف جدًا وأمي تعالجت، أنا مستورة لكن غيري لا، لكن في النهاية أمي اتعالجت في مستشفى حميات إمبابة وأمي اتعالجت ببلاش وهي بصحة جيدة.. سيادة الرئيس، ربنا يجبر بخاطرك زي ما جبرت بخاطر كل الناس اللي بتعاني من فيروس سي، والنهارده الرئيس برضه جبر بخاطري ورجّعني ليهم برضه واتعالجت في مستشفى عام".
