أبعِد عن الغوص في الكتابة البليدة
واكتب
كأني طفل
بيحب بنت ضفايرها نول من شمس
أكتب كتابات ابتدائي
وما أجمل غرام الأمس
بدون تقييد ببحر الشعر
على بحرك با خَطّي
على روحي بِخطّي
كتبت اسمك
انا لما برسم حلم عمري ياحبيبتي
فبيبقى بَسمك
بحروف بريئة
أو من جيوب المريلة
بارسل اليكي مودتي
عشقي
وابيِّن لك
ياعاشقة ماعشقت العاشق
ياوردة مخاصمه بستانك
أنا كان نفسي أكون رسمة
لوردة ف قلب فستانك
ماتيجي نغني انا وانتي
نشد ستاير السموات تبان مطرة
وبالرقص العفي نضلل على الفقرا
ياكل احلامي في عنيكي
اذا اشتد البكا في عيني
يعود الدمع أدراجه
اذا شافك يزول الألم
اذا مال القصيد لبعيد
يعود قلمي لأدراجه
ولا يكتبش شيء القلم
سوا عنك
عشان مايشذ فيه النغم
صحيح القرب منك صعب
لكن في الجيش
يموتوا العاشقين في الوطن
يموتوا العاشقين في اللغم
ياعاشقة ما عشقت العاشق
قوليلي ازاي
اكون فارس في أيامك
وانا قيدي في نني عنيك
بحب عنيك اذا تضحك
لكن حق العيون تزعل
وحقك تجلدي فيا
انا موافق
خدي حقك من الأحزان بأحزاني
خدي حقك من الدنيا بحرماني
خدي حقك من التوهة
واتوه في بحر توهاني
خدي مني اللي ناقصك بس
سيبيلي قلبك أعشق بيه
بقايا ذكرى سجّاني
بقايا الصحبة والرفقة
وانا وعدي
بما باقي هافرَّط روحي مِسبحتك
وهاعمل قلبي شماعتك
وهعمل خدي ليكي مداس
اذا تغضب عيونك اصفعيه بيهم
واذا ترضى شفايفك حق ليه يتباس
وعزة ضحكتك سبحان ما سواها
وجلالتها
لاحبك حب يتحاكوا السهارى عليه
وهاخلق ليكي كل ما عمرنا يعدّي
سنين أطول من الفايتة
بحبك للهوا وذاتك
وهاكره كل شيء تأبيه
وهاعشق في ملذاتك
هنتقاسم كُتب ياما
ونرويها على الأيام
ساعات فيه كلام
ما أصدق قوله ع الافعال
ولو ع الفعل انا فاعل
ومشعال ليكي في العتمة
ومش عال قلبي في بعادك
فضاءك راح انا اسبح فيه بخفيَّه
يضيئك كل رفرفة من جناح روحي
تعالي نلعب اللعبة القدر جاهز
نقدم حلمنا خطوة
ونرجع للقديم خطوة
كأن انا وانتي جوز أطفال
في وقت المدرسة بدري
وايدي في ايدك انتي وبس
بقلمي الطفل
والشنطة
ومسطرتي
وكراستي
ماتيجي تعلميني الحب
ياضحكة سور فِ مدرستي
وتختة في وجهة الدنيا
واسم انا بكتبه ف قلبي
كفاية اللي انتهى امبارح
وضاع سنوات نعوضها
ما ياما صواري خوفناها
لكن نقدر نروضها
انا قلبي هايصبح خُف
ياريت تمشي بُه ع الأشواك
ياطفلة ف منتهى الرقة
ورق ف غنوتي بهواك
صحيح فيه كسر ف جبيني
وفي روحي
ومالية جسدي ياجروحي
لكن لو عضم في القفة
أنا اقدر أبني هذا الكون
لكن بإشارة من إيدك
فحبيني
عشان عشقان
وولهان عشقه مع حيران
ياحيرانه
ياسايبة القلب وياكي
ونايمة انا روحي سهرانه
أنا السكران بِحُبك يا
يا اللي ببُعدي سكرانه
بحبك حتى آخر رشفة من عمري
هاتبلعها السنين وتموت
خلاصة القول
اذا عيل صَغير يكتب
اكيد هيقول: بحبك بموت
لذلك آهو
بحبك موت
