اية معنى إن حد يزاحمك ويحاول إنه يخشك؟!
ويسحب من روحك روح كانت سبياك
ويعزم بعيونة عليك
ويقيد بكلامه بخور م الجاوى
ويطاردك فين ماتروح وكانة مخاوى
ف الاتيليه أو على ترابيزة جوة كافية
ويفتح ف كتابه ويتمتم بحروف وطلاسم
ويسأل وأنت ترد.....
من أمتى دم العشق اتجلط جوه ف قلبك؟
وازاى أقرب حد إليك......
بيقول إنه اكيد مش شايل ذنبك
وأنك مدمن وبتتعاطى دخان اوهامك
وأن الحلم اللى قابلته ف يوم فاتك
وأنت بعبطك متخيل انة واقف قدامك
ايه معنى إنك تفضل مبهور بهالات من نور كداب؟
وتسمية الوحى اللى بيجلب خيط أشعارك
مع إن مداره مش هو مدارك
يبقى الحل دعامة تسند قلبك
وتحوط شرايينه لجل الدم يسيل من تانى
وساعتها الحد اللى يزاحمك ويخشك
يصبح منك....
مش فجأة يصبح واحد تاني
