"عمري ما اوكل نفسي ولا عيالي حرام".. بهذه العبارة عبر سائق السيارة الميكروباص الأمين، الذي عثر على حقيبة داخل سيارته، عقب تفريغ حمولة الركاب، بكفر الشيخ، وردها إلى سيدة بعدما تركتها داخل سيارته، وبداخلها 5 غوايش، وخاتم ذهب، تقدر بنحو 100 ألف جنيه، ومبلغ من المال.
ويقول السائق مبروك العمدة، 46 عامًا، والمقيم بقرية دمرو الحدادي، التابعة لمركز سيدي سالم، محافظة كفر الشيخ، إنه كان يحمل الركاب في سيارته، التي تعمل على خط دمرو- كفر الشيخ، وبعدما وصل للعاصمة دق هاتفه، فإذ بزميله على مصطفى، يخبره بأن يبحث عن حقيبة في سيارته، تركتها إحدى السيدات، مقيمة بقرية الخوالد، التابعة لسيدي سالم، وبالفعل حينما بحث وجدها، وفتحها ليجد بها 5 غوايش، وخاتم ذهب، ومبلغ مالي، في كيس في نفس الشنطة.
ويضيف: "علطول قولتله موجودين، وتواصلنا مع الست، جت خدت حاجتها، وصورناها علشان نبرأ نفسنا، إحنا متعودين على كدة، بنلاقي أشياء ثمينة، وبنرجعها لأصحابها، مأكلش ولادي حرام، ولا أكل مال حرام، ملناش غير سمعتنا وصحتنا، وبنتعب ونكافح علشان نربي ولادنا بالحلال، والست كانت مبسوطة، لما لقت حاجتها كاملة، الحمدلله".
ويتابع السائق: "عندي ولدين، وشغال على الخط سواق، بقالي سنين، والناس تعرفني والحمد لله، عمرى ما اكل حرام، إحنا نشقى ونتعب علشان لقمة العيش، وشوفت الفرحة في عيون الست لما أخدت حاجتها، وطلبت من الحاج على مصطفى يصورنا، تكفيني كلمة شكر، ومكافأتنا عند الله، بندعيه يسترها معانا، ويمتعنا بالصحة".
ولم تكن هذه هي المرة الأولى، التي يعثر فيها السائق أو زملاؤه بالموقف، على أموال أو ذهب، فقبل شهر من الآن، عثر زميله على مصطفى، على شنطة داخل سيارته، بها 53 ألف جنيهًا وردها لصاحبها.
يقول السائق علي مصطفى: احنا شغالين على خط دمرو- كفر الشيخ، وبنتعرض لمواقف كتير، في ناس بتنسى أشياء ثمينة، من شهر كدة رجل نسى 53 الف جنيه، في شنطة بعربيتي، وأول ما اتصل عليا رجعتهم له".
ويتابع، السيدة رنت عليا، وادتني أوصاف السواق، قولتلها دا عم مبروك، قالتلي نسيت شنطة، وأدلت بمواصفاتها، كلمته، فقالي فعلًا في شنطة موجودة في العربية، فتحناها لقينا فيها 5 غوايش، وخاتم ذهب، تمنهم يعدى الـ100 ألف جنيه، وكيس فيه مبلغ من المال.
ويضيف: قلت لازم نتصور بالحاجة، علشان نبرأ ذمة عم مبروك، ممكن الست تكون واخدة الذهب والفلوس من ورا زوجها، أو في أى مشكلة، علشان كدة حرصنا على تصويرهم، كانت بتعيط ولما خدت حاجتها فرحت، الحمدلله ان ربنا جعلنا سبب في عودة الابتسامة لوجهها مرة تانية".
