تعرض الطالب أحمد عمر بمدينة كفر الشيخ للتنمر خلال تقدمه لاختبارات
القدرات للالتحاق بكلية التربية الرياضية جامعة كفر الشيخ، لكنه تلقى رد قاس من
أحد الدكاترة المشرفين في الكلية بسبب وجود عيب خلقي في وجهه واستبعده من
الاختبارات قائلا له: "شكلك وحش متنفعش للكلية"، الأمر الذي دعا الطالب
لكتابة الموقف الذي حدث له على صفحته الشخصية على موقع التواصل الاجتماعي
"فيس بوك".
يحكي أحمد قصته قائلًا: "توجهت الساعة ٩ لكلية التربية الرياضية
بكفر الشيخ، عشان أقدم الورق وأدخل الاختبارات وقعدت انزل واطلع من الساعة ٩
للساعة ١، وبعد كدا قعدت ساعة على ما دخلوني ودفعت ٤٥٠ جنيه الأول غير الورق اللي
صورته وبعد كدا دخلت وقلعت عاريًا ماعدا البوكسر علشان الاختبارات والكشف الطبي".
وأضاف: "بعد كدا قست الطول والوزن وطلع مناسب جدا، وبعد كدا رحت
للدكتور التاني عشان الاختبار.. قالي انزل عشره ضغط.. أقف على مشط رجلك ونط.. اقعد
واقف وأنت مربع من غير ما تسند، وبعد كدا قالونا ننزل الكمامة وبعدها لقيت نظراته
ليا اتغيرت وقعد مركز معايا شوية ومركز ف شفتي قوي، بعدها ندلي قالي اسمك ايه
قولته أسمي".
وتابع: "الدكتور قالي إيه اللي ف شفتك دا.. قولتله عمليه حضرتك
وبعد خمس شهور بالكتير هعمل عمليه تانية وشفتي هترجع طبيعية وهشيل التقويم وهبقي
زي الفل.. فقالي طب ارجع تاني وقفت مع زمايلي فلقيته قالهم روحوا انتوا للخطوات
اللي بعد كدا، وقالي أقف أنت عاوزك.. طبعا أنا استغربت.. اللي هو فيه أيه، وبعدين إيه
النظرات اللي بيبصهلي، وبعد ما ذنبني شويه قالي تعالى، فروحت، قالي روح البس هدومك
وروح.. قولته ليه يا دكتور دا انا حتى لسه ما دخلتش اختبار الجري ولا حتى الخطوات
اللي بعد كدا.. قالي أنت شكلك مينفعش.. قالي عشان مصلحتك بس قولتله الكلية كلها
حركة وجرى وسباحه ولو في بوكس وملاكمه، فأنا بقول لحضرتك أنا بعد خمس شهور كل دا
هبقي زي الفل.. قالي أنت كشكل أصلا مينفعش يبني وبعد كدا، قالي أتفضل روح البس
وروح".
وتابع الطالب: "أقسم بالله أن كان معي واحد ١٢٠ كيلو وأتقبل
عادي... نزلت سألتهم وقولتلهم عايز الـ٤٥٠ جنيه، عشان امشي لأني لسه حتى لم أدخل
الاختبارات ولا عملت أي حاجة يعني دفعتهم على الفاضي، لكن الأمن قالي ما فيش
ياباشا، مينفعش تستردهم تاني.. طلعت لحد مهم فوق في مكتبه قالي طالما كتبت اسمك
على الظرف يبقى متعرفش تاخدهم.. قولتله تمام بس أنا أصلا مدخلتش الاختبارات يعني
لو دخلت أوك إنما أنا مدخلتش، وكانت معاملته كانت في منتهى الاحترام بس على كلامه أنه
ميقدرش يعمل شيء نزلت وانا مش مسامح ف الفلوس طبعا".
واختتم قائلا: "اللي موتني إن أنا ليه متقبلتش علشان شكلي مش لايق على الكلية على كلام اللي كان فوق فالكشف الطبي.. يعني أنا قبيح.. بلد ماشيه بالعنصرية طول عمرها.. أنا وأنا طفل ياما خدت تريقة واتعنصرت عنصره هدمت آمالي وطموحاتي في حاجه أنا مليش ذنب فيها".
